Almatyda endi kıno túsirý ońaıyraq bolady. Jyl sońyna deıin shaharda qurylatyn arnaıy komısıa kınoprodúserlermen tikeleı jumys istep, qaladaǵy kınotúsirilimderdi uıymdastyryp berýmen aınalysady.

Gollıvýd mamandary túsirgen The Lord of the Rings (Vlastelın koles) trılogıasyn kórmegen jan búginde óte az dep senimmen aıtýǵa bolady. Fılm prokattan 3 mlrd dollarǵa jýyq tabys tapqan. Al, álem turǵyndarynyń kóbi Jańa Zelandıanyń sulýlyǵyn osy fılm arqyly tanyp-bildi. Mıllıondaǵan adam kınonyń túsirilimi bolǵan jerge jyl saıyn aǵylyp jatyr. Máselen, týyndy jaryq kórgennen keıin Jańa Zelandıaǵa baratyn týrıser sany 40 paıyzǵa artqan. Onda fılmde qoldanylǵan dekorasıalar qaz-qalpynda saqtaýly tur.

Almaty ákimdigi kınomarketıng salasyn bizde de damytýdy qolǵa aldy. Endi megapolıste arnaıy komısıa qurylmaq. Olar kınoprodúserlermen birlese jumys isteıdi. Iaǵnı, túsirilimdi uıymdastyrýǵa kómektesedi. Máselen, qaladaǵy tarıhı oryndarda túsirilim jasaýǵa, ýaqytsha kósheniń belgili bir bóligin jabýǵa septesedi. Komısıa bir tereze qaǵıdasy boıynsha jumys istemek.      

«Mysaly, men prodúser retinde Almatyda fılm túsirgim keldi. Ol úshin aldymen kınokomıssıaǵa tolyq senarıdi kórsetemin. Qalada naqty ne kerektigin túsindiremin. Sodan keıin ol uıym jaýapty departamentpen kelisim júrgizedi. Biz aldymen ýaqytty únemdeımiz. Ár organǵa, mekemege ótinish hat jazýdyń da qajeti bolmaıdy», - deıdi prodúser Ernar Qurmashev.

Bul jumystardyń barlyǵyn «Almaty fılm» komısıasy isteıdi. Mamandardyń aıtýynsha, kınoprodúserlerge járdemdesetin uıymdar álemniń 40-qa jýyq elinde bar eken.  

«Fılm túsirý barysynda ýaqyt óte qymbat. Al, uıymdastyrý máselesi tez sheshilip otyrsa, ol bizge úlken kómek bolady. Negizi prodúserlerdiń jaǵdaıyn jasaıtyn uıym jas rejıserlerdi qoldaýmen qatar, qalany jarnamalaýǵa úlken múmkindik týǵyzady», - deıdi amerıkalyq prodúser Drú Felmen.

«Almaty fılm» komısıasy túsirilimderdi uıymdastyryp qana qoımaı, qalanyń ımıjin kóterýmen de aınalysady. Kınogerlerdiń sózinshe, qalada túrli janrda kıno túsirýge tolyq múmkindik bar.

«Prodúserler osy qalaǵa kelip, quny 100 mıllıon dollarǵa deıin jetetin fılm túsiredi. Megapolıste tehnıkalardy, dekorasıalardy jáne transportty jalǵa alady. Munyń barlyǵy ekonomıkanyń damýyna da kóp septesetini sózsiz», - deıdi prodúser Ernar Qurmashev.  

Kınokomıssıa osy jyldyń sońyna deıin jumysyn bastaıdy. Endi birneshe jyldan keıin Almatyǵa da Jańa Zelandıaǵa týrıserdiń aǵylǵany sekildi álem halyqtarynyń kóptep kelýi ábden múmkin.