Almatyda alǵash ret uıymdastyrylyp otyrǵan «Alataý alabynda» atty halyqaralyq dástúrli óner festıvali óz máresine jetti. Túrki elderinen jınalǵan ónerpazdar keshe Abaı atyndaǵy opera jáne balet teatrynan bastap, Panfılov, Jibek joly kóshelerin ánge bólep, qala turǵyndarynyń kóńilin kótergen bolatyn. «Alataý dástúrli óner teatrynda» túrki halyqtary óner sheberleriniń qatysýymen gala-konsert ótti.

Gala konsertke jınalǵandardyń qarasy qalyń. Osydan bir saǵat buryn bastalǵan sharada túrki elderinen jınalǵan jyrshylar óner kórsetip úlgerdi. Munda túrki halyqtarynyń dástúrli ánderi men jyrlary, sonymen qatar, kúıleri de túrli aspapta oryndalyp jatyr. Festıváldiń ereksheligi – ónerpazdar týyndylardy kómeımen aıtady. Sondaı-aq, ár eldiń jyraýlyq-jyrshylyq dástúriniń maqamdarymen oryndaýda. Festıválge qatysýshylar da ózderiniń alǵan áserlerimen bólisti.

«Alataý alabynda» atty festıvál Qala kúnine arnaıy ótkizilip otyrǵan shara. Merekelik konsertte Túrkıa, Ázerbaıjan, Ózbekstan, Soltústik Kıpr, Tatarstan, Taýly Altaı, Hakasıa jáne Tyva syndy 11 elden barlyǵy 16 jyrshy óner kórsetýde. Uıymdastyrýshylar festıváldiń túrki elderin jaqyndastyryp qana qoımaı, qazaq dalasyndaǵy dástúrli ónerdi ózge túrki elderine keńinen tanystyrýǵa múmkindik beretinin aıtady.

Eske salaıyq, atalǵan festıvál elimizde alǵash ret ótti. Sharany «Alataý» dástúrli óner teatry men «TÚRKSOI» halyqaralyq uıymy birlese uıymdastyrǵan. Mundaı túrki elderiniń dástúrli ónerin dúıim jurtqa dáripteıtin shara aldaǵy ýaqytta da Almatyda kóptep ótkizilmek.