Almaty ákimi Baýyrjan Baıbek Benın Respýblıkasynyń ekonomıkalyq ortalyǵy bolyp tabylatyn Abome-Kalavı qalasynyń meri Jorj Badamen kezdesti. Taraptar mádenı-gýmanıtarlyq baılanystardy kúsheıtý jáne qalalardy damytý boıynsha tájirıbe almasý máselelerin talqylady.

Megapolıs ákimi geografıalyq qashyqtyqta qatysty Almaty men Benın arasyndaǵy ekonomıkalyq baılanystyń shekteýli ekenin, alaıda mádenı-gýmanıtarlyq salada yntymaqtastyqtyń joǵary ekenin atap ótti.

Jyl saıyn qalada halyqaralyq kólemde Spirit of Tengri, Star of Asia, halyqaralyq jaz festıvali, orkestrler parady syndy 50-den astam sharalar ótedi, bularǵa benındik shyǵarmashylyq ujymdardyń qatysýy ózara baılanysqa tyń serpin berip, dostyqty nyǵaıtýǵa yqpal eter edi.

Óziniń sózinde Jorj Bada Abome-Kalavı qalasynyń halyqaralyq baılanysty nyǵaıtyp, damyǵan qalalardyń úzdik praktıkasyn ıgerýge múddeli ekenin jetkizdi.

«Men kóptegen elderde boldym, Qazaqstanǵa kelýim alǵash ret. Almatynyń kúzgi kórinisi meni tánti etti. Bizge qalanyń qaı baǵytta damýy, týyndaǵan máselelerdiń qalaı sheshimin tabatyny qyzyq. Onyń ústine megapolıs taýdyń etegine ornalasqan eken, demek sizderde tótenshe jaǵdaılardyń aldyn alý jáne qorǵaný boıynsha naqtyly tájirıbe jınaqtalǵan. Tyǵyz baılanys ornatyp, tájirıbe almasatyn bolamyz. Bolashaqta Benın qazaqstandyqtar úshin batys Afrıkanyń esigine aınalady degen úmittemiz», - dedi Abome-Kalavı meri.