Almatyda Qala kúnine arnalǵan aýqymdy merekelik sharalar ótýde. Mereke kúni dástúrli «Apple Fest» alma festıvali uıymdastyrylyp, shara birden birneshe alańdarda: QR Tuńǵysh Prezıdentiniń saıabaǵynda, Panfılov kóshesinde, Almaty Arena aldyndaǵy alańda, Jibek Joly kóshesinde, Abaı jáne Astana alańdarynda, Ortalyq mádenıet jáne demalys saıabaǵynda, «Kóktóbede» ótti.

Megapolıs ákimi Baýyrjan Baıbek qala turǵyndary men qonaqtaryn aıtýly merekemen quttyqtady.

«Elbasynyń tapsyrmasy boıynsha biz Almatyny álemniń úzdik megapolısteriniń birine aınaldyrý úshin qala keńistigin júıeli transformasıalaýdy bastadyq.

Osy ýaqyt ishinde «Qala adamdar úshin» jobasy aıasynda tarıhı ortalyqtyń 60%-y jańardy, jaıaý júrginshi joldary ekonomıkaǵa oń yqpal etýde, bıznesti yntalandyryp, jańa jumys oryndary qurylýda.

Almatylyqtarǵa qalanyń qaı jerinde turatyndyǵyna qaramastan birdeı jaǵdaı jasalýda. Ortalyqtandyrý qaǵıdasy boıynsha barlyq aýdandar damý ústinde. Qala turǵyndary jer asty ótpeli joldardyń qaýipsizdigi men tazalyǵyn joǵary baǵalaýda. Árbir úshinshi aýla, 500-den astam kóshe jańardy, parkter men skverler túrlendi, jasyl jelek aýmaǵy ulǵaıdy, qalanyń 130 tarıhı ǵımaraty túnge qaraı arhıtektýralyq jaryqpen nurlana tústi.

Qurmetti almatylyqtar, aldymyzda kóptegen ister sheshimin kútýde, sizdermen birge olardy júzege asyratynymyzǵa men senimdimin, Almatynyń ár adam tulǵa retinde qalyptasyp,armany oryndalatyn ásem qalaǵa aınalatyny aqıqat. Qalaǵa jáne Sizderge ardaqty almatylyqtar, odan ári gúldený men órken jaıýdy shyn júrekten tileımin!», - dep atap ótti Baýyrjan Baıbek.

Saltanatty shara basrysynda «Almaty qalasynyń qurmetti azamaty» ataǵy Qazaqstan tarıhyndaǵy alǵashqy áıel- elshi Aqmaral Arystanbekovaǵa, halyq artısi Eskendir Hasanǵalıevke, ǵalym- ádebıetanýshy Serik Qırabaevqa berildi.

Qala kúni qurmetine oraı QR Tuńǵysh Prezıdentiniń saıabaǵynda eń uzyn «Quraq kórpeniń» Gınestiń rekordtar Kitabyna enýine qatysty tusaýkeser ótýde. Ulttyq kórpeniń uzyndyǵy 10900 metr, saıabaqty túgel alyp jatyr. Eske salsaq, qazaqı kórpeni jasaýǵa qalanyń jáne óńirlerdiń sheberleri mol úles qosty. Quraq kórpeni tigý Naýryz merekesi kezinde bastalǵan edi.

Qala kúni merekesi Almaty Arenadaǵy «B-DAY Party» konsertimen jáne «Astana» alańynda túngi saǵat 21:00-de bolatyn salútpen aıaqtalady.