Jumys sapary kezinde Almaty ákimi Baýyrjan Baıbek qalanyń kólik ınfraqurylymyn rekonstrýksıalaý qarqynyn tekserdi jáne jeke avtopark alǵan №128 baǵyt boıynsha qyzmet kórsetetin jańa avtobýstardy kórdi.

Qazirgi kezde BRT jelisi boıynsha 28 tuǵyrnamada 68 beketti pavılondar jasaqtalýda, trotýarlar men velojoldar abattandyrylýda, jasyl jelek otyrǵyzylýda. Aıdyń sońyna deıin Mustafın jáne Súleımenov kóshelerine jaryq beretin 115 torsherdi montajdaý aıaqtalady.

BRT avtobýs jelisinde 17 baǵyt boıynsha 300-den astam kólik birligi júretin bolady. Jolaýshylar kóligi jáne avtomobıl joldary basqarmasynyń aqparaty boıynsha jyl aıaǵyna deıin 18 metrli avtobýstar júretin qosymsha baǵyt ashý josparlanǵan.

«Júrgizilgen saraptama 12 qyrkúıekte BRT jelisin iske qosý arqasynda jolaýshylar aǵyny bir kúnde 100 den 142 myń adamǵa, ıaǵnı ótken jyldyń osy kezeńimen salystyrǵanda 40 paıyzǵa artatynyn kórsetti. «Atakentten» Qazaq Ulttyq Ýnıversıtetine avtobýs 2,5 mınýtta jetedi eken, al buryn 10 mınýtqa sozylatyn», - dedi basqarmadaǵylar.

Tımırázev kóshesiniń keıbir qıylystaryndaǵy baǵdarshamdar obektilerinde jaıaý júrginshiler úshin jeke fazalar qarastyrylady.JKA aldyn alý úshin İİD birge vıdeofıksasıanyń avtomatty jelisi ornatylatyn 10 toraptyq núkte belgilendi.

Jumys sapary barysynda megapolıs basshysy jeke avtopark alǵan Yutong markaly jańa avtobýstardy kórdi.

Eski jyljymaly sostavqa turǵyndar tarapynan kóp shaǵym túsetin, ony retke keltirý úshin №128 baǵyt boıynsha endi tómen edendi 12 metrli 17 kólik birligi jolaýshylardy tasymaldaıdy. Bulardan ózge, qarashada tasymaldaýshy №72 baǵyttaǵy jyljymaly sostavty tolyq jańartady.

Jalpy, jyl aıaǵyna deıin jańa qoǵamdyq kóliktiń úlesin 80%-ke deıin jetkizý josparlanǵan.

Aıta keterligi, jalpy Almatyda bıylǵy jyly 524 kóshe jóndeldi, 1400 eski aýla jańardy.300 km aryq salyndy jáne jóndeldi, 800 km ınjenerlik jeli tartyldy.

Qalanyń barlyq jer asty ótpeli joldary jańardy. Jyl aıaǵyna deıin barlyq kóshe jaryqtarynyń úshten biri jaryq dıodty jáne energıa jınaqtaýshy shamdarǵa aýystyrylady.