Almaty ákimi Baýyrjan Baıbek qalanyń jaıaý júrginshi ınfraqurylymyn rekonstrýksıalaýdaǵy qurylys jumystarynyń qarqyny men sapasyn tekserdi. Megapolıs basshysy qalanyń birqatar dańǵyldary men kóshelerin aralap shyǵyp, merdigerlik uıymdar basshylaryna naqtyly eskertýler jasady.

Jumys sapary barysynda qala basshysy Abylaı han dańǵylyna qaıta jasaý jumystaryn júrgizgen «Elıtstroı» qurylys kompanıasynyń enshiles uıymyn qatań synǵa aldy.

«Belgilengen merzim bylaı tursyn, birde -bir ýchaskede jumys sapaly atqarylmaǵan.Kespe tastar ıirilip tóselingen, trotýarlar men qozǵalys aımaǵy túıispeıdi. Al «Almaty 2» temirjol vokzalynyń aınalasyn eki aı boıyna retteı almaı kelesińder. Qaýipsizdik bóligi jasalmaǵan, sýdan aryltý qarastyrylmaǵan. Jastar teatry aldyndaǵy jumysty maýsym aıyna bastasańdar da kúni búginge deıin aıaqtaǵan joqsyńdar. Sender ózderiń óz kompanıalaryńnyń bedeline nusqan keltirýdesińder. Kemshilikterdi túzetýge eki aı merzim beremin», - dedi ol kompanıa dırektory Alekseı Balaganskııge.

Olaı etpegen jaǵdaıda bul uıym jaýapsyz kompanıalar tizimine enetin bolady.

Qala basshysy atap ótkendeı, qurylysty uıymdastyrý jumystary da syn kótermeıdi. Jaıaý júrginshiler men kólikterdiń qaýipsiz qozǵalýy úshin qarapaıym jaǵdaılar jasalmaǵan.

«Jerdi qazǵan kezde adamdar qalaı júredi dep oılaý kerek qoı. Aldymen jaǵdaı jasaý qajet. Mine, myna jerde gaz jelileri aýystyrylǵan, trotýardaǵy eski qubyrlar áli kúnge deıin alynbaǵan», - dep syn aıtty Baýyrjan Baıbek Abylaı han dańǵylyn Qurmanǵazy kóshesinen tómen ýchaskede aralaǵan kezde.

Ol merdigerlerdiń nazaryn kóp jerlerde gazonnyń bordúr deńgeıinen joǵary turǵanyna da aýdardy.

«Aryqtardyń jıegine rýlondy gazondar tóselipti. Sapasyz jasalǵandyqtan ol qazirdiń ózinde qulap jatyr, al qar tazalaǵanda ne bolmaq. Bulardyń barlyǵyn qaıta jasaısyńdar. Ýchaskelerdiń kóbinde olar bordúrden joǵary tur. Erteń laıdyń barlyǵy trotýarlar men aryqtarǵa jaıylady ǵoı», - dep renish bildirdi qala ákimi.

Qalanyń Qurylys basqarmasynyń basshysy Nurbol Nursaǵatov dańǵyldy jańǵyrtý kezinde jiberilgen olqylyqtardyń tolyq jóndelgenin, al kompanıaǵa kemshilikterdi túzetý týraly eskertpe berilgenin aıtty. Eskertpeler oryndalmasa tıisti aıyppul sanksıalary salynady.

«Jumys áli qabyldanǵan joq. Demek, barlyq kemshilikter joıylyp, joba tolyq kóleminde sapaly atqarylmaıynsha jumysqa aqy tólenbeıtini belgili» - dedi ol.

Buryndary Baýyrjan Baıbek Respýblıka Saraıy aldyndaǵy Abaı alańyna trotýar plıtkasyn tóseýde jiberlgen kemshilikterdi túzetýdi tapsyrǵan bolatyn. «TRIA Holdıń» merdigerlik uıymynyń basshysy Mıhaıl Chıkaev kompanıanyń barlyq olqylyqtardy ornyn toltyratynyn aıtty. Onyń ústine jumys qala turǵyndaryna qolaısyzdyq týdyrmaıtyndaı etip uıymdastyrylǵan.

Eske salsaq, bıylǵy jyly Almatyda rekonstrýksıa aıasynda qalanyń birqatar dańǵyldarynda jaıaý júrginshi keńistigi keńeıdi. Asfálttyń ornyna kespe tastar tóseldi. Dıodty jaryq kózderi, jańa baǵdarshamdar ornatylyp, jańa fontandar salyndy. Ǵımarattardyń syrty men kire beristeri jańardy. Qazan aıynda jańarǵan dańǵyldarǵa jasyl jelekter men aǵashtar otyrǵyzylady.

Jalpy, Almatyda 524 kóshe jóndeldi,1400 eski aýlalar jańardy. 300 km aryqtar salyndy jáne jóndeldi, 800 km ınjenerlik jeliler tartyldy.

Qalanyń barlyq ótpeli joldary jańardy. Jyl aıaǵyna deıin qalanyń barlyq jaryq kózderiniń úshten biri jaryq jaryq dıodty jáne energıa jınaqtaýshy shamdarǵa aýystyrylady.