Memleket basshysy qalany tıimdi basqarýǵa arnalǵan aýqymdy málimetter (Big Data) platformasyn qamtıtyn ahýaldyq ortalyqtyń jumysymen tanysty. Qalalyq jáne respýblıkalyq 10 júıeniń birigýi shahardaǵy avtotrafık, qoǵamdyq kóliktegi júrginshiler aǵynynyń kúndelikti kólemi, mektepter men balabaqshalardyń júktemesi, qylmystyq ahýal jónindegi málimetterdi taldaýǵa, sondaı-aq búdjettiń oryndalýyna monıtorıń júrgizýge múmkindik beredi.

Sonymen qatar, Nursultan Nazarbaevqa qaladaǵy túrli úderister kólemin retteýge, ımıtasıalaýǵa jáne modeldeýge múmkindigi bar 3D-proeksıa túrindegi Almatynyń golografıkalyq maketi tanystyryldy.

Qazaqstan Prezıdenti «Almaty Bas jospary» ǵylymı-zertteý ınstıtýtyn aralap kórgen soń Almaty qalasyn odan ári damytý jóninde birqatar tapsyrma berdi.

Memleket basshysy zaýyt jumysy jónindegi baıandamany tyńdap, úshinshi býyn sanalatyn elektrli avtobýstar jasaý óndirisiniń tehnologıalyq úderisimen tanysty.

Bul jobany iske asyrýǵa 15 mıllıard teńge kóleminde jeke ınvestısıa tartyldy. Oǵan memlekettik qoldaý arqyly Almaty qalasynyń ákimdigi tarapynan jer telimi bólingen jáne 2 mıllıard teńgege sýmen qamtý jáne elektr jelileri tartylǵan.

Ónimdilik qýaty jylyna 100 elektrli avtobýs shyǵaratyn zaýyt 1 myńnan astam adamdy jumyspen qamtıdy.

Qazaqstan Prezıdentine Almaty qalasynyń ındýstrıalyq aımaǵyndaǵy jumys nátıjeleri men ony damytýdyń perspektıvalyq josparlary jóninde málimdeldi.

Nursultan Nazarbaev joǵary tehnologıaly tok ótkizgish kabel ónimderin shyǵaratyn «KMK Investment» jaýapkershiligi shekteýli seriktestiginiń óndiristik sıklimen, sondaı-aq daıyn ónim úlgilerimen tanysty.

Kásiporyn jumysshylarymen áńgimelesken Elbasy óndiriste eýropalyq sapaǵa saı básekege qabiletti ónim shyǵarýǵa múmkindik beretin zamanaýı tehnologıa men qurylǵylar qoldanýdyń mańyzdylyǵyn atap ótti.

Memleket basshysy «Tokyo Rope Almaty» jaýapkershiligi shektelý seriktestiginiń zaýytynda metal gabıon toryn jasaıtyn avtomattandyrylǵan óndirispen tanysyp, daıyn ónim úlgilerin kórdi.

Qazaqstan Prezıdenti Almaty qalasyna jumys sapary barysynda jaıaý júrginshiler men velosıpedshiler úshin ınfraqurylymy qaıta jasaqtalǵan Abaı dańǵylyn aralap kórdi.

Qala ákimi Baýyrjan Baıbek Memleket basshysyna shahar tirshiligin sáýlet-qurylys júrgizý turǵysynan retteý úshin pılottyq rejimde engizilgen jańa dızaıyn-kod ádisi jóninde málimdedi. Bul ádis megapolıstiń biryńǵaı stılin qalyptastyrýǵa arnalǵan ári bir qujatta naqtylanǵan erejeler men usynymdardy aıqyndaıdy.

Sonymen qatar, Nursultan Nazarbaev jalpy uzyndyǵy 8,7 shaqyrymdy qamtıtyn Tımırázev jáne Jandosov kósheleriniń boıymen tartylǵan BRT kóshe-jol jelisimen tanysty.