Almatynyń Alataý aýdanynda qýaty jylyna 550 myń tonna turmystyq qatqyl qaldyqtardy óńdeıtin qoqys suryptaý kesheni iske qosyldy, sonyń arqasynda polıgonda tek qana ınertti qaýipsiz jáne bıoirigish materıaldar kómiletin bolady.

Kásiporynda qaıta óńdeý úshin 50 myń tonnaǵa deıin karton, selofan, áınek, plasıka, metal sıaqty zattar suryptalady. Bolashaqta keshen janynan shıkizattardy ekinshi qaıtara tereń óńdeý úshin qosymsha qýattardy jasaý josparlanǵan. Osynyń barlyǵy jáne qaldyqtardy óńdeýdi basqarýdyń keshendi júıesin engizý qalany qorshaǵan ortaǵa túsetin ekologıalyq júktemeni azaıtýǵa oıdaǵydaı yqpal etedi.

Megapolıs ákimi Baýyrjan Baıbek mundaı mańyzdy keshendi iske qosý tek qala úshin ǵana emes, jalpy elimiz úshin eleýli oqıǵa ekenin atap ótti.

«Memleket basshysy jańa tehnologıalardy engize otyryp kásiporyndardyń tıimdiligin ǵana emes, sonymen qatar ekologıalyq jaǵdaıyn jaqsartý qajettigin turaqty nazarda ustaýda jáne elimizde qabyldanǵan sıfrlandyrý baǵdarlamasy da osy baǵytta júzege asýda. Bul keshen-ozyq tehnologıanyń úlgisi ári 2017 jylǵy EHSRO-nyń negizgi muralarynyń biri. Joba memlekettik-jeke áriptestik qaǵıda boıynsha qolǵa alynǵan, 5,4 mlrd. teńgege ınvestormen 25 jylǵa kelisim jasaldy, al qala óz kezeginde jer bólip, barlyq ınjenerlik komýnıkasıalardy júrgizdi», - dep atap ótti Baýyrjan Baıbek.

3,9 ga aýmaqqa ákimshilik blok, Ulybrıtanıada jasalǵan arnaıy tehnıkanyń garajy jáne ozyq ıtalándyq qondyrǵylarmen jabdyqtalǵan negizgi óńdeý bólmeleri ornalasqan. Kásiporyndy iske qosý barysynda 530 turaqty jumys orny paıda boldy.

«Tártip» AQ-nyń basqarma tóraǵasy Aıbek Rahımov qala ákimshiligi men jeke ınvestorlar konsorsıýmy arasynda uzaq merzimge jasalǵan kelisim kásiporynnyń barynsha tıimdi jumys atqaratynynyń ozyq modeli bolatyndyǵyn aıtty. Qazirgi kezde «Tártip» AQ TQQ-dyń 70%-yn qamtıdy.Kompanıa balansynda 236 tehnıka birligi bar, qoqys tasymaldaıtyn barlyq kólikterde GPS júıesi jumys isteıdi, planshetter arqyly qoqys alańyndaǵy jaǵdaılar túgel kórinedi. Uzaq merzimdi kelisimniń negizgi tarmaqtarynyń biri avtoparkti únemi jańartý jáne jumys prosesin avtomattandyrý bolyp tabylady. Qazirdiń ózinde Evro-4 standartynyń 30 mashınasy satyp alyndy jáne baǵyttardy dıspecherleý júıesi engizildi.

«Elimizde iske asyp jatqan oń ózgeristerge jáne jeke kompanıalar konsorsıýmy men qala ákimdiginiń birigip jasaǵan kelisimniń arqasynda biz óte qysqa merzimde, ıaǵnı joba maketi talqylanǵan bir jyl ishinde mańyzdy keshendi iske qostyq. Kásiporynnyń basty maqsaty – bolashaqta qorshaǵan ortaǵa túsetin júktemeni azaıtý. Biz bul keshenniń ózgelerge, sonyń ishinde kórshi elderge úlgi bolatyndyǵyna senimdimiz, olar úlken qyzyǵýshylyq tanytýda, óńirdiń odan ári órkendeýi úshin damýdy jalǵastyra beremiz», - dedi «GREEN RECYCLE» JSHS dırektory Dmıtrıı Danılchenko.