Almatyǵa jaqynda qosylǵan Naýryzbaı aýdanynda 1200 oryndy jańa memlekettik mektep ashyldy, munda erekshe bilimdi qajet etetin balalardyń tereń ári sapaly dáris alýlary úshin barlyq jaǵdaılar jasalǵan. Qala ákimi Baýyrjan Baıbek taıaýda ǵana paıdalanýǵa berilgen 1200 oryndy mekteptiń oqýshylarymen jáne olardyń ata- analarymen kezdesti.

Jańa oqý ornynda robot tehnıkalary kabınetteri, fızıka men hımıanyń arnaıy synyptary, ata – analardyń qonaq bólmeleri, oıyn alańdary jáne basqalary bar. Munda seısmıkalyq qaýipsizdikke erekshe mán berilgen, sondyqtan barlyq jabdyqtar men mektep jıhazdary qabyrǵalarǵa myqtap bekitilgen.

Mektep ǵımaraty taktıldi jolmen, soqyr jáne arnaıy shyraqtardyń ózimen áreń kóretin balalar úshin Braıldiń relefti- núkteli shrıfteri arqyly dáris beretin synyptarmen, arnaıy sanıtarlyq bólmelermen jáne shaqyrý núktelerimen tolyq qamtamasyz etilgen.

«Barynsha qolaıly jáne jaqsy mektep. Arbamen júrýde esh kedergi bolmaý úshin lıft jumys isteıdi. Biz osydan tórt jyl buryn Qytaıdan týǵan Otanymyzǵa oralǵan bolatynbyz. Ókinishke oraı, meniń Zárýim syndy balalardyń onda bilim alýlaryna esh múmkindik jasalmaǵan. Men týǵan elime oralýdy, qyzymnyń Qazaqstanda bilim alýyn armandadym. Memleket basshysyna rahmet, elimizde balalardyń bilim alýy úshin barlyq jaǵdaılar qarastyrylǵan, jat jurttan kelsek te bizdi eshkim ózgelerden bólgen joq, qaıta qushaqtaryn ashty. Armanym, qyzymnyń óz aıaǵymen tik turýy», - dedi birinshi synyp oqýshysy Moldasan Gúlbibiniń anasy.

Birinshi synyp oqýshysynyń ózi jańa mekteptiń unaıtynyn jáne synyptastarymen tanysqanyn aıtty.

Búgin 240 myńnan astam almatylyq oqýshylar úshin alǵashqy qońyraý soǵyldy, olardyń 25 myńy - birinshi synyptyqtar. Dál osy kúni Almatyda 2300 oryndy taǵy jańa tórt mektep esikterin aıqara ashty.

Eske salsaq, Almatyda bıylǵy jyly bilim oshaqtaryn salý men kúrdeli jóndeýden ótkizýge 17 mlrd. teńgeden astam qarjy bólindi.

1840 oryndy 9 memlekettik bala baqsha qurylysy júrýde.Jańa oqý jylynda 840 oryndy taǵy 4 memlekettik bala baqshanyń qurylysy bastalady.

№26 mekteptiń eski ǵımaraty jańardy. 90 oryndy korreksıalyq bala baqsha ashyldy. Alataý aýdanyndaǵy №151 mektep janynan salynǵan 600 oryndy qosalqy nysan paıdalanýǵa berildi.Oqý jylynyń ekinshi toqsanynyń basynda munda 600 oryndy mektep pen №184, 185 mektepter janynan árqaısysy 400 oryndy qosalqy nysandar ashylatyn bolady.

Elbasynyń «Bes áleýmettik bastamasy» aıasynda Almatyda taıaýdaǵy úsh jyl ishinde 37 jataqhana salynady.Qazirdiń ózinde 4 myń oryndy 7 jataqhana qurylystary bastaldy. Olardyń tórteýi bıylǵy jyly paıdalanýǵa beriledi.