Almatyda múmkindigi shekteýli azamattar arasynda shaǵyn fýtboldan týrnır ótti. Eki jyldan beri uıymdastyrylyp kele jatqan jarysta bıyl tek qalalyq ınternattyń tárbıelenýshileri ǵana emes, oblys jastary da baq synady. Aladop básekesinde jeńiske jetken komandaǵa Polshada ótetin dodaǵa joldama beriledi.

Eldostyń bala kezinen fýtbolǵa degen qyzyǵýshylyǵy joǵary. Bos ýaqytynda dostarymen jınalyp, dop tebedi. 22 jastaǵy bozbala byltyr da shaǵyn fýtboldan ótken jarysqa qatysqan. Ol jastar komandasynda oınaıdy. Osydan birneshe aı buryn olar Polshada ótken halyqaralyq lıgada baǵyn synapty.  

«Ol jaqta basty qarsylas Reseı, Germanıa boldy. Bárimiz birge bala kezden qatysyp kele jatqan komandamyz ekinshi otbasymyz sıaqty bolyp ketti. Birge kúlip-oınap, daıyndalyp, baratyn jerimizge birge baratynymyz unaıdy», – deıdi Eldos Ámirbek.

Qalada ótip jatqan shaǵyn fýtbol týrınırinde sportshylardyń jas ereksheligine shekteý qoıylmaǵan. Munda 18 jastan asqan azamattar qatysady.

«Bizdiń óz ortamyzda múgedekterge degen kózqarastyń ózgerip jatqany qýantady. Internat úıinde turatyn múgedekterdiń sportqa degen qyzyǵýshylyǵy oıanyp keledi. Olar ótken jyly Polshaǵa baryp, el kórip qaıtty. Bıyl da is-sharaǵa qatysatyn adamdar sanyn kóbeıtý bolyp tur», – dedi Almaty qalasy Jumyspen qamtý jáne áleýmettik baǵdarlamalar basqarmasynyń basshysy Meıirjan Otynshıev.

Bıylǵy shaǵyn fýtbol týrnıri qatysýshylar sanynyń kóptigimen erekshelenedi. Odan bólek, tek almatylyq jastar ǵana emes, Almaty oblysynyń sportshylary da synǵa túsip jatyr. 12 komanda qatysqan aladop básekesinde jeńiske jetkender Polshada ótetin sport dodasynda elimizdiń namysyn qorǵaýǵa barady.