Alash kósemi Álıhan Bókeıhanǵa ol oqyǵan Reseıdegi Sankt-Peterbor memlekettik orman-tehnıkalyq ýnıversıtetine eskertkish taqta ornatylatyn boldy.
Bul usynysty, ıaǵnı eskertkish taqta ornatýdy «Aq jol» Demokratıalyq partıasynyń tóraǵasy, Májilis depýtaty Azat Perýashev bastaǵan parlamenttik fraksıa usynyp, atalmysh Ýnıversıtettiń rektoryna arnaıy hat joldaǵan bolatyn. Nátıjesinde osyndaı sátti de, qýanyshty sheshim qabyldandy.
♦"Sankt-Peterbýrgte Álıhannyń memorıaldy taqtasy ornatylsyn"
Odan bólek partıa ult kóseminiń qıan-keski kúreske toly ǵumyrynyń aqyrǵy 15 jylyn ótkizgen Máskeýdegi B. Kıslovskıı oramy, 4 úıi men Samara qalasyndaǵy 1909-1917 jyldary turǵan Kazanskaıa kóshesi, 32 úıine de estelik taqta ornatý isin de qolǵa alyp otyr.
Jýyrda bul ıgilikti iske baılanysty Azat Perýashev Qazaqstannyń Reseıdegi Elshisi Imanǵalı Tasmaǵambetovke arnaıy hat joldady.
«Aq joldyń» osyndaı júıeli usynystary men naqty isteriniń arqasynda búgin tańerteń Sankt-Peterbordan qýanyshty habar kelip jetti. Alash kósemi Álıhan Bókeıhannyń 1890-1894 jyldary oqyp bitirgen burynǵy Imperatorlyq Orman ınstıtýty, qazirgi Sankt-Peterbor memlekettik orman-tehnıkalyq ýnıversıtetiniń Ǵylymı keńesi bas ǵımaratynyń mańdaıshasyna óziniń dańqty túlegi, 2015 jyly IýNESKO «Búkil álemdik shynaıy dańqty qaıratker» dep jarıalaǵan Álıhan Bókeıhan týraly estelik taqta ornatý týraly partıanyń usynysyn basym daýyspen qoldap (27 daýys qoldady, 7 daýys qarsy, 5 daýys qalys qaldy), ıgilikti sheshim qabyldady.
Osy oraıda Qazaqstan Respýblıkasynyń Sankt-Peterbýrg qalasyndaǵy Bas Konsýly Bolat Imanbaevpen baılanysqa shyǵyp, bul jóninde aqparat alǵan edik.
Bas konsýl: «Daýys berý kezinde partıanyń joldaǵan usynysy basymdyqpen qoldaý tapty. Endi bul másele Sankt-Peterbýrg Úkimetiniń tarıhı eskertkishterdi qorǵaý jónindegi Komısıasynda qaralatyn bolady. Sondaı-aq, Alash arysyn este qaldyrý tek munymen bitpeıdi. Aldaǵy ýaqytta Sankt-Peterbor memlekettik Orman-tehnıkalyq ýnıversıtetinde oqıtyn úzdik qazaqstandyq stýdentterge Álıhan Bókeıhan atyndaǵy stıpendıa taǵaıyndaý týraly másele qaralyp jatyr», - dep jaǵymdy jańalyǵyn habarlady.
Sonymen qatar, bul istiń júzege asyrylýyna úılestirýshi retinde atsalysqan alashtanýshy ǵalym Sultan Han Aqquly men sol ınstıtýttyń túlegi Maıken Ázenovtiń eńbegin de atap ótken jón.
Sanaly ǵumyryn ulttyq memlekettiń irgetasyn kóterýge sarp etken Alash kósemi Álıhan Bókeıhan esimi árqashanda ardaqtaýǵa laıyqty.
