Mańǵystaý óńirinde memlekettik qyzmetke degen qyzyǵýshylyq eki ese artyp, nátıjesinde bos oryndar sany azaıǵan. Bul memlekettik qyzmetshilerge eńbekaqy tóleýdiń jańa júıesin engizýdiń oń nátıjesi. Bul týraly búgin óńirlik komýnıkasıalar qyzmetinde ótken brıfıńte belgili boldy.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamentiniń basshysy, Ádep jónindegi keńes tóraıymy Nurgúl Jannazarovanyń aıtýynsha, qazirgi bos oryndar sany - 95, al ótken jyldyń osy kezeńimen salystyrǵanda bul kórsetkish 166 bolatyn. Taza aýysymdylyq sany 2,3-esege jýyq azaıǵan. Jalpy konkýrs boıynsha bir orynǵa 1,9 adamdy qurady.
Máselen, jalpy konkýrs boıynsha oblystyq memlekettik satyp alý basqarmasynda jarıalanǵan bas mamanyna 14 úmitker, ındýstrıa jáne ınovasıa basqarmasy jarıalanǵan bos orynǵa 13 úmitker, densaýlyq saqtaý basqarmasy jarıalaǵan bos orynǵa 8 úmitker, mádenıet basqarmasynda kadr bóliminiń bas mamanyna jarıalanǵan orynǵa 8 úmitker, Munaıly aýdany Qyzyltóbe aýyldyq okrýgi ákiminiń apparaty bas mamanyna jarıalanǵan laýazymǵa 5 úmitker, Aqtaý qalasynyń ákimdigi komýnaldyq-sharýashylyq sektorynyń bas mamanyna 9 úmitker qujat tapsyrǵan.
Ótken jylmen salystyrǵanda, testileýden ótýge nıet bildirgen úmitkerlerdiń sany 1,9 esege ósip otyr. Bul, memlekettik qyzmetshilerdiń eńbekaqy tóleýdiń jańa júıesiniń engizilýimen oblys turǵyndarynyń memlekettik qyzmetke degen qyzyǵýshylyǵynyń artqandyǵyn kórsetip otyr.
Sonymen birge, eseptik kezeńniń qorytyndysy boıynsha júrgizilgen qupıa saýalnamaǵa pılottyq joba engizilgen jergilikti atqarýshy organdarynyń 1051 qyzmetshisi qatysyp, jańa eńbekaqy tóleý júıesine tolyqtaı kelisetindigin jáne oń baǵa beretindigin bildirgen.
Mańǵystaý oblysy ákimi apparaty basshysynyń orynbasary Ásel Balmanovanyń aıtýynsha, jyl basynan faktorly-baldyq shákil negizinde Mańǵystaý oblysynyń jergilikti atqarýshy organdarynyń memlekettik qyzmetshilerine eńbekaqy tóleýdiń pılottyq jobasy engizilgennen bastap oń dınamıka baıqalady.
Daıyndyq jumystary kezinde aldymen basshy jáne orynbasary, ákim jáne orynbasary, basshy jáne oryndaýshy, oryndaýshy jáne oryndaýshy arasyndaǵy qaıtalama fýnksıalardy anyqtaý mindeti turǵan. 164 memlekettik organdardyń erejelerine jáne 1285 laýazymdyq nusqaýlyqtarǵa taldaý júrgizý úshin 2 aı ýaqyt ketken. Faktorly-baldyq shákildi engizýmen qatar, aǵymdaǵy jyldyń qańtar-mamayr aılary aralyǵynda oblystyq, aýdandyq, qalalyq jáne aýyldyq ákimdikterdiń, basqarmalardyń barlyq erejeleri men laýazymdyq nusqaýlyqtaryn deńgeılerge sáıkes keltirý 5 aı ýaqyt alǵan.
Eńbekaqy ortasha eseppen 2,5 ese ósip, bos oryndar sany 65,7% qysqarǵan, taza aýysymdylyq 2 ese tómendep, eńbek shartymen qyzmet etip júrgender 84 birlikke qysqartylyp, memlekettik qyzmetke úmitkerler sany 206 % ósken. Sondaı-aq, memlekettik kórsetiletin qyzmtetter sany 3 ese ósip, memlekettik kórsetiletin qyzmetterdiń sapasyna kelip túsken shaǵymdardyń sany 4 ese azaıǵan, basshylyq laýazymdar sany azaıyp, oryndaýshylyq laýazymdar ósip otyr.
