Búgin aqyn Ábdirahman Asylbekov dúnıeden ótti. Bul týraly ánshi Meırambek Besbaev óziniń Instagram jelisindegi paraqshasynda jazdy, dep habarlaıdy Qamshy.kz aqparat agenttigi.
«Búgin aqyn Ábdirahman Asylbekov aǵamyz dúnıeden ótti. Alla aldynan jarylqasyn. «Boztorǵaımen» kókke samǵatqan aǵamnyń týǵan-týystaryna qaıǵyryp kóńil aıtamyn», - dep jazdy ánshi.
Ábdirahman Asylbekov 1938 jyldyń 1 mamyrynda Jambyl oblysy Talas aýdany Úsharal aýylynda dúnıege kelgen.
Onyń 1955 jyly «Beıbitshilik baqshasy», «Jaýdy aıaǵan jaraly» syndy shyǵarmalary jaryq kórdi.. 1961 jyly balalarǵa arnalǵan alǵashqy óleń jyldary jarıalana bastady. Osy ýaqytqa deıin 30-ǵa jýyq kitabyn shyǵardy. Lırıka, án mátinderin jazyp, satıra jáne aýdarma janrlarymen aınalysyp keldi. Kóptegen baıqaýlardyń jeńimpazy, júldeger. Meırambektiń daýsymen kúlli qazaq álemine máshhúr bolǵan «Boztorǵaı» ániniń ári Jeltoqsan kóterilisiniń ekinshi kúni jazylǵan «Jeltoqsan jeli» ániniń sózderin jazǵan da Ábdirahman Asylbekov edi. Qazaq toılarynyń kórkin ashyp júrgen ataqty «Jar-jar» ániniń avtory da – Ábdirahman aǵamyz.
«Osy kúnge deıin 300-deı ánge mátin jazyppyn. Onyń barlyǵy birdeı efırden berilgenimen, kún saıyn tórt-beseýi shyrqalyp turady. Shetelde bolsa, múmkin baıyp keter me edim?.. Biraq negizi qazaqta kúnde birneshe toı bolyp jatyr, áıtse de sonyń barlyǵy qadaǵalanyp, avtorlyq quqyqqa baǵyna bermeıtini ókinishti. Eger solardan tym qurysa, 100 teńgeden aýdarylyp tursa, men mıllıonerge aınalyp keter me edim», - dep bir kúlip alǵan edi aqyn birneshe jyl buryn «Alash aınasy» basylymyna bergen suhbatynda.
Aqyn aǵamyzdyń talaı áni qazaqtyń júreginen oryn alǵan. Ánderi toılarda da, konsertter men merekelik sharalarda da shyrqalyp júr. Alaıda ánderi tanymal bolǵanymen aqynǵa qaraılasqandardyń sany az edi. Úıine bir barǵanymyzda qabyrǵalarynyń toz-tozy shyqqan bir bólmeli jupyny jataqhanada turatynyn bildim. Munyń ózine shúkirlik etken aqyn aǵamdy kórdim. Ol tirisinde halyqtan da, bılikten de kómek suraǵan joq. Ultyna tek mynany aıtty:
Alashqa aıtar datym...
Qazir qazaq bilim de alyp, shetelge shyǵyp ta jatyr. Biraq sonyń «qazaǵym» deıtini az. Ulttyq, eldik namys degen jetispeıdi. Til, dil, jer – osy úsh nárse ǵoı, memleketti, eldi ultty anyqtaıtyn. Sondyqtan meniń olardy oılamaýym múmkin emes. Sebebi tilim joıylyp, sózim suıylyp, keıingi urpaqqa jetpeı jatsa, urpaǵym ózime jat bop ketse, men ne úshin jazamyn?!. Men degenimde jalǵyz ózim emes, jalpy búgingi aǵa býyndy meńzep turmyn. Rasýl Gamzatov: «Eger ana tilim erteń óledi dese, men búgin ólýge barmyn», – deıdi ǵoı. Ár qazaqtyń kókeıinde osy oı tursa, ár adam óz ultyn solaı súıse, shirkin! Ókinishke qaraı, til týraly aıtqyshtar kóp bolǵanymen, onyń shyn janashyrlary az. Tildi túzeýge 10-15 jyl keńdik berý jón emes, menińshe, kórshiles ózbekter nemese Baltyq jaǵalaýy elderi sekildi, birden betburys jasaǵan durys. Biz jumsaqtyq emes, solqyldaqtyń tanytyp júrgende, ózimizge qatań úkim shyǵaryp, tilimizden qalaı aıyrylyp qalǵanymyzdy baıqamaı da qalýymyz kádik! Sondyqtan qapy qalmaıyq!
Qamshy.kz aqparat agenttigi Ábdirahman Asylbekovtyń týǵan-týystaryna qaıǵyryp kóńil aıtady.
