Almatyda ekonomıkalyq jáne sybaılas jemqorlyqpen kúres departamentini (ESJK) basshysynyń burynǵy orynbasary Muratbek Qazybaev tutqyndaldy.

Qazir, eks-polkovnık tergeý ızolátoryna qamalǵan. Sondaı-aq, Almaty qalalyq ESJK-niń taǵy bir polkovnıgi, Qanat Artyqbaevqa izdeý salyndy, dep habarlaıdy "Qamshy" portaly KazTAG-qa silteme jasaı otyryp.

Tutqynǵa alynǵan eks-polkovnık Qazybaev buryn, SHQO boıynsha ekonomıkalyq jáne sybaılas jemqorlyqpen kúres departamentin basqarsa, Artyqbaev Qaraǵandy oblysy boıynsha ESJK basshysy qyzmetin atqarǵan.

Ázirge, quzyrly organdar atalmysh iske qatysty resmı málemdeme jasamaǵan.

Al 2015 jyldyń aqpanynda Almaty qalasynda qarjylyq alaıaqtyqpen aınalysyp kelgen uıymdasqan qylmystyq top quryqtalǵan bolatyn. Keıbir derekterge súıensek, olarǵa uzaq ýaqyt boıy fınpoldyń eks-basshylarynyń kómegine súıenip, jalǵan kásip odaq quryp, asa iri kólemde qarjy qymqyrǵan degen aıyp taǵylǵan. Uıymdasqan qylmystyq top músheleri 20 jalǵan mekeme quryp, 2012 jyldan 2014 jyl aralyǵynda 60 mıllıard teńgege jýyq, al salyq esebinen 14 mıllıard teńgeni qaltalaryna basqan. Sondaı-aq, tergeý barysynda anyqtalǵandaı, Almaty qalalyq İİB qyzmetkerleri uıymdasqan qylmystyq toptyń 8 múshesin quryqtaǵan. Olar: Fedotov, Ilın, Baýdınov, Karımov, Zýbarov, Abdıev, Esenjanov jáne Shaýkerov.

Sonymen qatar, 55 jastaǵy eks-basshy Ámirbek Amanbaev 2 naýryz kúni tutqyndalǵan. Quqyq qorǵaý qyzmetkerleri kelgen ýaqytta Amanbaevtyń júregi qysylyp, jedel járdem kóligimen aýrýhanaǵa jetkizilgen. Al 5 naýryz kúni Amanbaev qamaýǵa alynǵan.

2014 jyldyń kúzinde Amanbaev ESJK qyzmetinen bosatylyp, genprokýratýraǵa aýysqan. Tipti, keıbir derekterde, Amanbaev QR Qarjy polısıasy basshysy laýazymyna basty úmitkerlerdiń biri bolǵandyǵy aıtalady.

Nurzat Toǵjan