26 sáýir - elimizde kezekten tys Prezıdent saılaýy ótedi.  Prezıdent saılaýy bolady degennen bastap daıyndyqtar bastalyp ketti. Jer-jerde úgit-násqat jumystary jalǵasýda. Bul saılaýǵa shet el azamaty bolyp júrgen 5 mıllıon qazaq ta eleńdep, el erteńine alańdap, ult kóshinde júk qaltyrmas nar tulǵasynyń elge basshy bolýyn qalap otyr.

Jaqynda ǵana «Qamshy-aqparat» portaly «Qazaq handyǵynyń 550 jyldyǵyn» el kóleminde úlken merkelik sharamen toılap, eldiń ishi-syrtynan qazaqtyń nar qasqa azamattaryn shaqyryp, ulty úshin jasaǵan eńbekteriniń marapatyn bergen edi. Bul sharaǵa QHR-da turatyn qandasarymyz da arnaıy keldi. Ol kisiler «Qazaq handyǵynyń 550 jyldyq» medalimen marapattalǵan ult qaıratkerleriniń ishinde májilis depýtaty Nurtaı Sabılánov myrza baryn estip, kezdesip jatsaq syrttaǵy el tilegin aýyzba-aýyz aıtarmyz dep qatty qýanǵan edi. Ókinishke oraı, Nurtaı myrza saılaýǵa baılanysty jumystarynyń qarbalastyǵymen bul sharaǵa kele almady.

Shettegi aǵaıynnyń aıtar sálemi úkimet 8 aı jasap, parlamenttiń 3 aı qarap áli bir sheshimin shyǵara almaǵan «Kóshi-qon týraly» zańǵa jasalatyn ózgertýler men tolyqtyrýlar edi. Shettegi aǵaıyn bul jolǵy el Prezıdentin saılaýǵa úlgerip qatysa alalmasaq ta, saılaýǵa deıin zań qabyldanyp Elbasymyzdyń qoly qoılyp, keler jylǵy Parlament saılaýyna óz daýysymyzdy beretindeı kúnge jetsek deıdi.

Iá, bul syrttaǵy 5 mıllıon qazaq pen el erteńine alańdap otyrǵan barsha qazaqtyń tilegi. "Máńgilik el" muratymyzǵa jetý jolynda bizge ár qazaq qymbat, «ár qazaq bizdiń jalǵyzymyz». Táýelsiz elimizdi túrli ishki-syrtqy alabóten kúshterden qorǵaý úshin qazaqtyń sandyq jáne sapalyq jaǵynan artýy mańyzdy. San bolmaı, sapa bolmaıtyny taǵy anyq. Sondyqtan el erteńine mańyzdy sheshimder jasalǵaly jatqanda osyndaı keleli isterdi birge atqaryp ketken jón bolar.

Densaýlyq Saqtaý jáne áleýmettik damý mınıstrligi ázirlegen zań jobasy osy jyldyń 6 qańtarynda Parlament tabaldyryǵyn attaǵan edi. Bir oqylymnan soń azdap syn-pikirler aıtylǵan soń ushty-kúıli joq boldy. Shynynda, bul zań Parlament pen Úkimettiń arasynda shaqpylap júrip joǵalyp ketpese ıgi. Al, ishtegi jáne syrttaǵy qandas aǵaıyn kóshi-qon týraly zań jaıly habardy ár tań saıyn eleńdep kútip otyr.

Qazaqtyń uly kóshin 23 jyl buryn Elbasy Nursultan Nazarbaev bastap edi. Al búgin sol kósh Parlamenttiń qolynda tur. Alda saılaý, Parlament Elbasymyz N. Nazarbaevty shynymen qoldasa, kóp kúttirmeı «Kóshi-qon týraly» zańdy Prezıdenttiń saılaý aldy baǵdarlamasy retinde qabyldap, saılaýda Elbasymyzǵa óz qoldaýlaryn bildirýi kerek.

Turdybek Qurmethan