8 qazanda bolǵan oqıǵa Reseıde úlken rezonans týdyrdy. «Zenıt» fýtbol klýbynyń shabýylshysy Aleksandr Kokorın, onyń inisi Kırıl Kokorın jáne «Krasnodar» fýtbol quramasynyń jartylaı qorǵaýshysy Pavel Mamaev reseılik eki sheneýnik Denıs Pak pen Sergeı Gaısındi uryp-soqqany úshin aıyptalyp otyr. Buzaqy fýtbolshylardyń taǵy bir tóbeleske qatysy bar ekeni anyqtalyp otyr.
Oqıǵa bylaı bolǵan. 8 qazanda Aleksandr Kokorın men onyń inisi jáne Pavel Mamaev reseılik telejúrgizýshi Olga Ýshakovanyń kólik júrgizýshisin uryp-soqqan. Bir top jigit pen jábirlenýshiniń arasynda kelispeýshilik týyndaıdy. Keıin bul tóbelespen aıaqtalady. Kólik júrgizýshisi aýyr jaraqattarmen aýrýhanaǵa túsken. Olga Ýshakova atalǵan is boıynsha polısıaǵa aryz jazdy. Dárigerlerdiń aıtýy boıynsha, jábirlenýshiniń murny synǵan jáne bastan aýyr jaraqat alǵan.
Araǵa bir saǵat salyp buzaqy fýtbolshylar taǵy da shý shyǵarady.
Aleksandr Kokorın men Pavel Mamaev jergilikti kafelerdiń birinde ishimdik iship, áńgimelesip otyrǵan. Olardyń janynda belgili bir máselelerdi aqyldasyp otyrǵan reseılik sheneýnik Denıs Pak pen Sergeı Gaısın bolǵan. Keıin shendiler jumystaryna kedergi jasap otyrǵan fýtbolshylarǵa shýlamaı, tynyshtyq saqtaýdy suraǵan. Bul ishimdikke mas bolǵan Kokorınniń shamyna tıip ketse kerek, ol Denıs Paktyń ultyna til tıgizgenimen qoımaı, ústelmen uryp, balaǵattaǵan. Beınebaqylaýǵa túsip qalǵan bul jaıt reseılik BAQ-tarda jarıalandy. Keıin Mamaev Kokorındi toqtatpaq bolǵan.
Denıs Pak atalmysh jaıtty jaıdan-jaı qaldyrmaıtynyn aıtqan. Sonymen birge sol kúngi tóbelesterge Kokorınniń inisi de qatysqan. Reseılik shendiniń aıtýy boıynsha, Pavel Mamaevtyń bul jaıtqa qatysy joq.
«Men Mamaevtyń maǵan qatysty balaǵat sózderin estimedim. Onyń bul iske qatysy joq», -dep málimdedi Denıs Pak. Biraq Denıs Aleksandr Kokorındi keshirmeıtinin aıtty.
11 qazanda Máskeýdiń qaq ortasynda bolǵan tóbeleske qatysty qylmystyq is qozǵalyp, Tversk aýdandyq soty 8 jeltoqsanǵa deıin Kokorın men Mamaevty tutqyndady. Qazir Aleksandr Kokorın men Pavel Mamaev tergeý ızolátorynda otyr. Olardy 7 jyl bas bostandyǵynan aıyrýy múmkin. Alaıda sot sheshim shyǵarǵanǵa deıin tergeý ızolátorynda otyrady. Tergeý ızolátorynyń qyzmetkerleriniń aıtýy boıynsha, tanymal fýtbolshylar kezektesip ájethana jýyp júr. Bul ózderiniń qalaýy eken. Sonymen birge Aleksandr Kokorın men Pavel Mamaev atalmysh jaıtqa baılanysty jábirlenýshilerden keshirim surap úlgergen.
Kezektesip ájethana tazalap júrgen fýtbolshylar sportzaldy ańsap júr. Bir kúndik ómirleri mynandaı: tez daıyndalatyn kespe, botqa, shaı, teledıdar, kitap. Shalqyp ómir súrgen fýtbolshylardyń jańa ómiri osylaı ótip jatyr. Sonymen birge olarǵa ata-anasy, týǵan-týysymen habarlasyp turýǵa múmkindik berilgen.
"Tańerteń botqa jeımin. Kelgen boıda sportzaldyń bar-joǵyn suraǵan edim. Kúndelikti jattyǵý úshin sportzalǵa baryp turýǵa ruqsat surap, ótinish te jazyp qoıdym. Maǵan kóptegen hattar kelip jatyr. Qazir sol hattarǵa jaýap berýge tyrysyp jatyrmyn. Birin qaldyrmaı oqımyn",-deıdi "Zenıttiń" oıynshysy.
Al "Býtyrka" túrmesinde sportzaldy qoldaný aqyly bolyp shyqty. Fýtbolshylar fızıkalyq formasyn joǵalpaý úshin kúnine 400 rúbl tólep, sportzaldy qoldana alady. Sonymen birge jattyǵýdan keıin dýsh qabyldaýǵa ruqsat etilgen. Negizi jazasyn óteýshiler aptasyna bir ret qana dýshty qoldanady. Qazir eki fýtbolshy da teledıdary bar, barlyq jaǵdaı jasalǵan kamerada otyr. Biraq Kokorın teledıdar qaraǵannan góri kitap oqyǵandy jón kóredi eken.
Sonymen qosa Ramzan Qadyrov Aleksandr Kokorınge óziniń "Ahmat" komandasynyń oıynshysy bolýyna múmkindik beretinin aıtyp qolqa salypty. Kokorın Ramzan Qadyrovke qoldaý bildirgeni úshin alǵys aıtty.
Bir aıta ketetini, tergeý ızolátorynda artyq qımyl-qozǵalysqa shekteý qoıylǵan. Biraq belgili bir aýyr jumystardy isteýge bolady. 1 saǵat serýenge ruqsat berilgen, al qalǵan 23 saǵat boıy tórt qabyrǵaǵa qarap otyrǵannan basqa amal joq.
