Fýtboldan Qazaqstan quramasynyń burynǵy kapıtany Qaırat Nurdáýletov pen jıý-jıtsý boıynsha álemniń qola júldegeri Gúljan Altynbekova jazasyn óteýshilermen kezdesti, dep habarlaıdy Qamshy.kz aqparat agenttigi Astana qalasy ákimdiginiń baspasóz qyzmetine silteme jasap.

«Astana jastary» KMM qylmystyq-atqarý júıesi departamentimen birlesip «Ómirlik qıyn jaǵdaıǵa tap bolǵan áleýmettik jaǵynan qorǵalmaǵan sanattaǵy jastardy qoldaýǵa baǵyttalǵan profılaktıkalyq is-sharalar» jobasy aıasynda tanymal sportshylar 166/5 túrmesinde otyrǵan jazasyn óteýshilermen kezdesti.

«Bul kezdesý jazasyn óteýshilerge qoldaý bildirip, qoǵamnyń bir bólshegi ekendigin túsindirýge arnaldy. Bizde osyndaı jeti kezdesý josparlanǵan. Sondaı-aq, jazasyn óteýshilermen keskindeme sabaǵyn ótkizý josparda bar. Qaırat Nurdáýletov jeksenbide jazasyn óteýshilermen birge fýtbol oınaýǵa kelisti. Olar kelesi kezdesýge Serik Sápıev pen Gennadıı Golovkındi shaqyrýdy surady. Olarǵa ataqty sporshylarmen sóılesý qyzyqty», – dedi «Astana jastary» KMM-niń dı⁠rektory Úkibaı Nurpeıisov.  

Kezdesý barysynda sportshylar jarystarǵa qalaı daıyndalatyndaryn jáne álemdik jarystarda Qazaqstan atynan saıysqa túsýdiń jaýapkershiligin aıtty.  «Jazasyn óteýshilerge ákimdik jaqsy kóńil bólýde. Al qoǵam qaıratkerleriniń olarmen kezdesýi olarǵa jiger beredi. Negizinen jazasyn óteýshilerge arnap sporttyq seksıalar ashylsa jaqsy, óıtkeni sport adamnyń tek fızıkalyq turǵyda emes jáne rýhanı damýyna da yqpal etedi», – deıdi Gúljan Nakıpova.

İs-sharanyń maqsaty – jazasyn óteýshilerge qoldaý, olardyń áleýmettik belsendiligin arttyrý, ortaǵa beıimdeý jáne jumysqa ornalastyrý.

«Olar qoǵamnyń bir bóligi. Jazasyn ótep bolǵan soń bizdiń ortalyqtan kómek surasa bolady. Eger arnaıy bilimi bolmasa daıyndyq kýrsynan ótip jumysqa tura alady. Jazasyn ótep kelgender qoǵamnan qalys qalmaýy kerek, bizde olarǵa arnalǵan baǵdarlama bar», – dedi Ú. Nurpeıisov.