«Azamattarǵa arnalǵan úkimet» memlekettik korporasıasy Almaty qalasy Naýryzbaı aýdandyq front-ofısinde sıfrlyq qyzmetterdi tanymal etýge arnalǵan aksıa ótti.

Sharaǵa estrada jáne sport juldyzdary - «Mýzart» tobynyń ánshileri Meırambek Bespaev, Kenjebek Janábilov, jıý-jıtsýdan, jaýyngerlik sambodan, jekpe-jekten sport sheberi, ISCP nusqasy boıynsha kásibı pankratıonnan álem chempıony, MMA boıynsha NOFC Gran-Prı týrnıriniń jeńimpazy Erjan Estanov, erejesiz jekpe-jekten álem chempıony Osmanjan Kasımov, ánshiler Roman Maıǵazıev, Talǵat Jorabaev, Raıym Ýaıys jáne taǵy basqa  tanymal tulǵalar qatysyp, Naýryzbaı aýdandyq front-ofıs kelýshilerine qyzmet kórsetti.

Aksıa barysynda azamattarǵa elektrondyq sıfrlyq qoltańba (ESQ) alý, mobıldi úkimetke tirkelý joldary kórsetildi. Juldyzdar elektrondyq kezek talonyn usynyp, memlekettik qyzmetterdi alý boıynsha keńes berdi. Turǵyndardyń sıfrlyq saýattylyǵyn kóterip, elektrondyq qyzmetterdi úıden nemese jumys ornynan óz betinshe alýǵa, «Elektrondyq úkimet» veb-portaly arqyly kóp suranysqa ıe anyqtamalardy alýǵa úıretip, smartfon, planshet arqyly bir rettik kod kómegimen óz málimetterin tekserý qyzmetterin keńinen nasıhattady. 

–Halyqqa qyzmet kórsetý ortalyǵyna jıi kelip júrip, munda qyzmet kórsetý osynshalyq jaýapkershilik pen sabyrlylyqty, tózimdilikti talap etetinin bilmeppin. Tolassyz kelip jatqan ár túrli minezdi adamdardyń kóńilin taýyp, sharshaǵanyńdy sezdirmeı, tik turyp qyzmet etý, suraqtaryna qanaǵattanarlyqpen jaýap berý ekiniń biriniń qolynan kele bermeıdi. Bul jerde jumys isteıtin azamattar besaspap mamandar, naǵyz tózimdi jaýyngerler der edim. HQO qyzmetkerleri kúnbe-kún engizilip jatqan sıfrlyq qyzmetterdi meńgere otyryp, ony ózgelerge úıretip, úlken jumys tyndyryp jatyr eken. Biz búgin olardy qoldap kelip otyrmyz. Bir kúngi azǵantaı qoldaýymyz, halyq ıgiligine jarap jatsa, maqsatymyzdyń oryndalǵany, – deıdi ánshi Roman Maıǵazıev. 

Qyzmet alýshylar óz kýmırleriniń qolynan anyqtamalar alyp qana qoımaı, olarmen sýretke túsý múmkindigin de jiberip almady.

 –Árbir adam óz ýaqytyn únemdep, memlekettik qyzmetterdi onlaın alýǵa úıretý maqsatynda mundaı aksıalardy ýnıversıtetterde, saýda ortalyqtarynda jáne t.b. adamdar kóp jınalatyn oryndarda ótkizip júrmiz, – deıdi «Azamattarǵa arnalǵan úkimet» memlekettik korporasıasy Almaty qalasy fılıalynyń PR-menedjeri Jańyl Ápetova.

       Aksıa aıasynda azamattarǵa sıfrlyq qyzmet alý joldary kórsetilgen arnaıy paraqshalar taratyldy.

      Kóptegen memlekettik qyzmetterdi úıden shyqpaı-aq alý esh qıyn emes. Ol úshin pki.gov.kz  arqyly ESQ alýǵa ótinish berip, memlekettik korporasıanyń kez-kelgen front-ofısine baryp ótinishin rastap, qajet bolsa ózine-ózi qyzmet kórsetý sektorynan qyzmet alýǵa baılanysty  tolyq keńes alýyna bolady. ESQ-syz da bir rettik SMS habarlama arqyly 40- tan asa memlekettik qyzmet túrin jáne EgovKzBot telegram bot  arqyly da alýǵa bolady.
     Mobıldik úkimet portplyna kez-kelgen HQO-da nemese  elektrondyq úkimet portalyndaǵy jeke kabınetińizde tirkelýge bolady.

Erkin Qaldan