Batys Qazaqstan oblysyndaǵy Beles aýylynyń turǵyny, fızıka pániniń muǵalimi Sherhan Baızenov Denıs Tenniń ólimi jaıly jazǵan jazbasy úshin 4 jylǵa sottaldy. Bul týraly Qamshy.kz aqparat agenttigi Tengrinews.kz portalynyń málimetine silteme jasap habarlaıdy.
Baızenov QR QK 174-babynyń 1 bólimi – Áleýmettik, ulttyq, rýlyq, násildik jáne dinı alaýyzdyqty týdyrý nemese nasıhattaý boıynsha aıypty dep tanyldy.
«Baızenovke 4 jylǵa shartty jazaǵa kesý týraly jaza taǵaıyndaldy. Baızenov áleýmettik jelidegi paraqshasyna ulttyq óshpendilikti nasıhattaıtyn jazba qaldyrǵan. Ol sotta óz kinásin tolyq moıyndady. Qylmystyq istiń materıaldaryna sáıkes, Baızenov kinásin tolyq moıyndady», - dep habarlady Oral qalalyq sotynyń sýdıasy Qaırat Óteshov.
Sot Baızenovke taǵaıyndalǵan jazanyń sebebin de túsindirip ótti.
«Baızenov budan buryn sotty bolmaǵan, jergilikti turǵyndar ony jaqsy jaǵynan sıpattaıdy, ári azamat óz kinásin moıyndady, otbasylyq jaǵdaıy da bar. Osy jaǵdaılardy eskergen sot eń jeńil jazany qoldandy», - dep pikir bildirdi Óteshov.
♦Denıs Tendi óltirdi degen kúdikti ustaldy
♦Denıs Tendi óltirgen ekinshi kúdiktiniń sıpattamasy paıda boldy
♦Denıs Tendi óltirdi degen kúdikti qylmysyn qalaı iske asyrǵanyn aıtyp berdi
Aıta keteıik, Baızenovtiń áleýmettik jelidegi jazbasy jurttyń narazylyǵyn týdyrǵan. Muǵalimniń ústinen shaǵym túsirgenderdiń qarasy kóbeıdi. Ol sabaq beretin mekteptegi oqýshylardyń ata-analaryna deıin shaǵymdanyp, balalaryna «ondaı muǵalimniń sabaq bergenin qalamaıtynyn» jetkizdi. Bul jaǵdaılardan keıin Baızenov mektep dırektoryna kirip, jumystan shyǵý týraly aryz jazypty.
