Eskerte ketetin bir jaıt, talapkerler úshin Ulttyq Biryńǵaı testileýdi qańtar aıynda tapsyrý múmkindigi týyp otyr. Alaıda, qańtar aıynda ótetin testileýden keıin talapker joǵary oqý ornyna tek aqyly negizde oqı alady. Ulttyq biryńǵaı testileýge ótinishter 1-15 jeltoqsan aralyǵynda qabyldanady. Memlekettik bilim berý granttary negizgi UBT tapsyrylǵannan keıin úlestiriletin bolady.  Bul týraly Bilim jáne ǵylym mınıstrliginiń baspasóz qyzmeti Qamshy.kz aqparat agenttigine habarlady.  

Sonymen, Ulttyq biryńǵaı testileýge (UBT) kimder qatysady?

– orta mektepterdiń 11-12 synyp oqýshylary (2019-2020 oqý jylynda JOO-da aqyly negizde oqý úshin). Qańtar aıynda ótetin bul testileý túlekterge negizgi testileýdiń aldynda óz bilimderin tekserý úshin taptyrmas múmkindik. Memlekettik bilim berý grantyna úmittengen talapker 2019 jylǵy jazda ótetin UBT-ny mindetti túrde tapsyrýy qajet. Óıtkeni, qańtar aıyndaǵy testileýde shekti bal jınaǵan testilenýshi bul sertıfıkatymen JOO-da tek aqyly negizde oqı alady;

– JOO-ǵa ýaqytsha tirkelgen jáne birinshi semestrdi aıaqtap jatqan stýdentter. Bul testileýden stýdent bilim alyp júrgen oqý ornyna resmı tirkelý úshin jáne JOO-daǵy oqýyn jalǵastyrý úshin ótedi. Eger stýdent shekti bal (50 bal) jınaı almasa, oqýdan shyǵarylatyn bolady.

Esterińizge sala keteıik, testilenýshiler qańtar aıynda ótetin UBT-ǵa qatysqannan keıin maýsym aıynda ótetin UBT-ǵa qatysý jáne memlekettik bilim berý granttaryn taǵaıyndaý boıynsha ótetin baıqaýǵa qatysý múmkindiginen aıyrylmaıdy. Testileýge qatysý úshin ótinishter ulttyq testileý ortalyǵynyń UBT tapsyrý pýnkterinde qabyldanady. Bilim jáne ǵylym mınıstrligi baspasóz qyzmetiniń habarlaýynsha, qańtar aıyndaǵy testileý aqyly, quny – 2242 teńge.