Poıyz apatynan zardap shekken azamat belsheden qaryzǵa batyp ketken. Aýyr jaraqat alǵandyqtan jumysqa jaramsyz bolyp qalǵan Álibı Baıjanov ózin osyndaı kúıge túsirgender otbasyn asyraýǵa járdem bersin dep otyr. Jubaıymen birge Almatyǵa bet alǵan ol jol ortasynda aýdarylǵan segiz vagonnyń birinde otyrǵan edi. Apat 4 aı buryn bolǵanymen, tergeý jumystary áli aıaqtalmaǵan eken. Bul týraly Eýrazıa birinshi arnasy habarlaıdy.
Bıyl maýsymda túsirilgen kadrlar bul. Almatyǵa bet alǵan poıyzdyń 8 birdeı vagony joldan shyǵyp, aýdarylǵan. Saldarynan 12 jastaǵy bir bala kóz jumdy. 22 adam jaralandy. Olardyń arasynda Álibı Baıjanov ta bar. Sol kúni eki aıaǵyn syndyryp alypty. Birneshe kúrdeli ota jasaldy. Qazir baldaqpen áýpirimdep júr. Óziniń kishigirim santehnıkalyq qyzmet kórsetetin toby bolǵan eken. Jumysqa jaramsyz bolyp qalǵandyqtan, úıge keler kiris te toqtapty.
«Gıpsty alyp, baldaqpen júrip júrmin. Óz aıaǵymmen turýǵa bolmaıdy. Eki aı júresiń dedi. Salmaq túsirýge bolmaıdy. Barlyǵyn qadaǵalap otyrady. Taǵy bir dáriler jazyp berdi endi. Úıde shydap ta otyra almaımyn men. Ózim jumys istep qalǵan adammyn. Shamaly qıyndaý bolady. Amal joq, ne isteımin. Júre almaımyn ázirge» - deıdi Astana qalasynyń turǵyny Álibı Baıjanov.
Álibı jubaıy ekeýi 4 bala asyrap otyr. Otanasy Aıgúl kenje balaǵa bas-kóz bolyp úıde otyrǵan. Endi joldasyna da kútim jasap júr. Apattan keıin saqtandyrý kompanıasynan bir rettik tólem jasalǵan. Temir jol kompanıasy da 1 mln teńge járdem beripti.
«Bul 1 mln teńge jalǵyz asyraý úshin jetpeıdi. Men ózim jumys istemeımin. Kórip otyrǵanyńyzdaı meniń joldasymnyń ózine bir adam kerek. Kún bolsa sýyp barady. Ot jaǵý kerek degendeı úıge. Onyń bárine 1 mln teńge ne bolady. Ary ketse 3 aıǵa jeter. Kórip otyrǵanyńyzdaı azyq-túliktiń bári qymbat Astanada» - deıdi Álibı Baıjanovtyń jubaıy Aıgúl Kárimova.
Erli-zaıyptylar amaldary taýsylǵan soń tamyr-tanystar men týǵan-týystan qaryz surap kún kórip júr qazir. Ózderiniń esepteýinshe, bereshegi 1 mln teńgeden asyp ketken. Jurttan kómek suraǵylary kelmeıdi. Tek Álibıdiń osy kúıge túsýine kinálilerden saýyqqansha ótemaqy berýin talap etýde. Aıgúl Kárimova biraz jerge hat jazyp kórgen. Biraq tushshymdy jaýap ala almapty. Kináli kim jáne taǵy qandaı ótemaqy berilýi múmkin ekenin surap biz de habarlastyq. Tergeý áli bitpepti. İske núkte qoıylǵansha tis jarmaımyz dep jaýap qatty Bas kólik prokýratýrasy.
BAS KÓLİK PROKÝRATÝRASYNYŃ RESMI JAÝABY:
«Kóliktegi ishki ister departamenti «Astana-Almaty» jolaýshylar poezynyń vagondary temirjol relsinen shyǵyp, jol apatyna ushyraý faktisi QR QK 344-baby 2-bóliginde kózdelgen qylmystyq quqyq buzýshylyq belgilerimen tirkelip, sotqa deıingi tergep-tekserý júrgizý ústinde ekenin habarlaıdy. QR Qylmystyq prosestik kodeksi 201-babynyń talaptaryna sáıkes Siz surastyryp otyrǵan aqparattar, tergeý múddesi aıasynda, qazirgi kezde jarıa etýge jatpaıdy».
4 aıǵa sozylǵan tergeýdiń qashan aıaqtalary áli belgisiz. Aıta keteıin, alǵashqyda jolaýshylar poıyzy ózge júk poıyzymen soqtyǵysyp qalýy múmkin ekendigi aıtylǵan. Biraq tergeýshiler ol paıymdy birden joqqa shyǵardy. Iaǵnı temir joldyń jaǵdaıyn teksergender nemese poıyz vagondarynyń jaǵdaıyna jaýaptylar jazalanýy múmkin. Bul tek tuspal ǵana.
