QR Aqparat jáne komýnıkasıalar mınıstri Dáýren Abaev qoǵamda birshama shý týǵyzǵan VLKSM-niń 100 jyldyǵyn atap ótý sharasyna qatysty óziniń pikirin bildirdi.
«Siz aıtyp otyrǵan sharany (júrizýshige qarata - avt.) múshelik jarnanyń jıynymen jáne (bálkim - Abaev) demeýshilik aqshamen Qazaqstannyń komýnıstik partıasy uıymdastyrǵan. Memlekettik búdjetten bir tıyn da shyqqan joq», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.
Mınıstr óz sózinde sonymen birge, komsomol kúnin atap ótý Alash avtonomıasynyń 100 jyldyǵyn kóleńkesinde qaldyrdy degen pikirge qatysty oıyn aıtty.
«Bul - tolyǵymen shyndyqqa sáıkes kelmeıdi. Bir jaǵynan birneshe júz adam teatrlardyń birinde shara ótkizedi de, ekinshi jaǵynan jyl boıy elimizdiń barlyq aımaqtarynda Alashtyń 100 jyldyǵyna arnalǵan sharalardyń tolyqqandy kesheni uıymdastyrylady», - dedi mınıstr.
Dáýren Abaev óz sózi dáleldi bola túsý úshin birneshe mysal keltirdi.
«Birinshiden, Alash qozǵalysynyń 100 jyldyǵyna oraı 12 serıalyq «Tar zaman» serıaly túsirildi. Ol «Qazaqstan» ulttyq arnasynda kórsetildi. Sonymen birge, kınoteatrlarda onyń tolyqmetrajdy nusqasy berildi. Dál sol sekildi birneshe fılmniń túsirilgenin atap ótý kerek. Onyń ishinde «Alash týy astynda» atty derekti fılmdi de aıta ketýge bolady. Memleket qarjysynyń esebinen Semeı qalasynda Álıhan Bókeıhannyń eskertkishi ornatyldy. «Alash arystary» mýzeıiniń ekspozısıalary jańartyldy. Tipti Alash qozǵalysy týraly birqatar kitap shyqty. BAQ-ta birshama materıal jarıalandy», - dedi mınıstr.
Dáýren Abaev sonymen birge, ótken jyldyń qyrkúıek aıynda Alashordanyń 100 jyldyǵyna arnalǵan iri halyqaralyq ǵylymı-praktıkalyq konferensıa ótkenin eske saldy.
«Esterińizde bolsa, ol sharaǵa Qazaqstan Respýblıkasynyń Memlekettik hatshysy Gúlshara Ábdihalyqova qatysyp, Memleket basshysynyń quttyqtaý sózin oqyp bergen bolatyn», - dedi Dáýren Abaev.
Mınıstr sonymen birge, komsomol kúnin atap ótý sharasynda «Rýhanı jańǵyrý» baǵdarlamasynyń logotıpi ilinip turǵanyna qatysty pikirin aıtty.
«Men bul rette Qoǵamdyq damý mınıstri Darhan Kaletaevtyń pikirimen tolyq kelisemin. Bizde túımedeı nárseni túıedeı etetin daǵdymyz baıqalyp qalyp jatyr. Bunymen kúresý kerek. Mundaı asyra silteýden memleket te, qoǵam da utpaıtynyn túsiný kerek. Men taǵy da qaıtalaımyn: VLKSM-niń 100 jyldyǵyn atap ótý - memlekettiń ıdeologıalyq saıasatymen ortaq túgi joq. Bul burynǵy komsomoldardyń qatysýymen ótken jeke shara bolatyn. Ony eski dostardyń nemese túlekterdiń kezdesýimen ǵana salystyrýǵa bolady. Odan artyq emes», - deıdi ol.
Dáýren Abaev óz sózinde ashyǵyn aıtqanda komsomol Qazaqstan úshin ótken kúnde qalǵanyn atap ótti.
«Biraq, ol ótken zamanda qazaqstandyqtardyń tolyǵymen býyny ómir súrgen. Biz buny joqqa shyǵara almaımyz. Komsomol arqyly ótken adamdardyń bizdiń elge sińirgen eńbegin de jasyra almaımyz. Qazir bul sharany synap jatqandardyń kóbiniń ózi de komsomol bolǵan. Al bul shara - saıası jıyn nemese komýnızmge degen nostalgıa emes, bul - jastyq shaqtaryn eske alǵan adamdardyń kezdesýi», - dedi Dáýren Abaev.
