Búgin oblys ákimi, «Nur Otan» partıasy SQOF tóraǵasy Qumar Aqsaqalov jáne partıa hatshysy Ilá Terenchenko XXVIII eseptik-saılaý konferensıasyna qatysty.
Konferensıa barysynda, partıanyń jergilikti fılıalynyń atqarǵan jumystary men «Nur Otan» partıasynyń qujattarynda bekitilgen baǵdarlamalardyń oryndalýy ári «Jastar jyly» aıasynda jastar saıasatynyń damý baǵyty talqylandy.
Partıanyń oblystyq fılıalynyń basshysy Qumar Aqsaqalov «Nur Otan» partıasynyń saılaý aldy platformasyn júzege asyrý jónindegi jumystarǵa belsene aralasýdy tapsyrdy. Sonymen qatar, partıashyldarǵa Elbasynyń bes áleýmettik bastamasynyń júzege asyrylýyn jáne Memleket basshysynyń «Qazaqstandyqtardyń áleýmettik jaǵdaıyn jaqsartý: tabys pen ómir sapasyn ulǵaıtý» atty Joldaýynyń oryndalýyn baqylaýǵa alý tapsyryldy. Óńir turǵyndary oblystaǵy, tipti memlekettegi bolyp jatqan jańalyqtar men ózgeristerden habardar bolyp otyrýy tıis.
«Nur Otan» partıasynyń saılaý aldy platformasynyń negizinde ne jasaldy, ne jasalady – osy suraqtardyń jaýabyn partıa músheleri aıqyndap, halyqty habardar etip otyrýy tıis. Bul ár túrli dárejedegi máslıhat depýtattaryna da tikeleı qatysty. Bes áleýmettik bastamanyń jáne Nursultan Ábishuly Nazarbaevtyń halyqqa Joldaýynyń oryndalýy baqylaýda bolady. Dál qazirgi ýaqytta bizdiń aldymyzdaǵy basty mindet – túsindirý men baqylaý. Aýyldy aımaqtarda, óńirde ne isteı alamyz, aldymen osyny túsinip alýymyz shart», - dedi oblys ákimi.
Buǵan qosa Qumar Aqsaqalov partıa quramyna azamattardy kúshtep kirgizbeý kerektigin eskertti. Turǵyndar, jastar partıanyń belsendi, kóńildi ári paıdaly ómirinen habardar bolsa, ózderi-aq aǵylyp keletin bolady.
«Máselen, «Qyzyljar Sý» kásipornynda myńǵa jýyq jumysker bar, olardyń 350-i partıanyń quramynda. Barlyq jumysshynyń partıa múshesi bolýy mindetti emes. Eger qandaı da bir jumys ornynda osyndaı jaǵdaı bolyp jatsa, munyń durys emes ekenin aıtqym keledi. Kerisinshe, partıanyń belsendi músheleri partıa saıasatyn kásiporynnyń ózge jumysshylaryna túsindirý kerek. Mundaı jumys ónimdi bolady», - dep sózin qorytyndylady Qumar Aqsaqalov.
