Kaspi banktiń baspasóz hatshysy Erbol Azanbek áleýmettik jeli arqyly taraǵan bank týraly aqparattyń jalǵan ekenin málimdedi. 

"Kaspi bankrot bolady, aqshalaryńdy alyńdar degen aýdıo habarlama ótirik. Bank basshylary ornynda. Bankte esh másele joq. Aldaǵy apta jańa ónimderdi tanystyrýǵa daıyndalýdamyz.  Jalǵan aqparatqa senbeńiz. Kez-kelgen máseleni jasyrmaı aıtatynymyzdy bilesizder. Resmı túrde bizde bári durys ekenin habarlaımyn. Alańdamańyzdar. Demalystaryńyz sátti ótsin", dep jazady Erbol Azanbek óziniń feısbýk paraqshasyna. 

Aıta ketsek, Whatsapp áleýmettik jelisi arqyly Kaspi banktiń bankrot bolǵany týraly aqparat taraǵan. 

"Kaspi bank resmı túrde bankrot bolǵanyn habarlady. Biraq ázirge jarıalaǵan joq. Basshylardyń barlyǵy elden qashyp ketti. Aqshalaryńyzdy 2 saǵattyń ishinde sheship alyńyzdar", delingen habarlamada. 

Ázirge atalmysh aqparatty kimniń taratqany belgisiz. 

Eske sala ketsek, 16-17 qarasha aralyǵynda Kaspi juma naýqany ótedi.