Ekologıalyq festıvál buǵan deıin Qazaqstannyń 12 qalasynda ótken. «Birge jarqyraımyz!» sharasynyń Aqtaýda ótken jıynynda óńirdiń ekologıalyq ahýaly, qaldyqtardy óńdeý, turǵyndardyń qoqystardy júıeleý psıhologıasyn qalyptastyrý máseleleri talqylandy.
Festıvál maqsaty – bilim berý mekemeleri arasynda ekologıalyq mádenıetti damytý, taza, jasyl qala retinde Aqtaý ıdeologıasyn nasıhattaý, energıa únemdeıtin tehnologıalarǵa, bólek qaldyqtardy jınaý úrdisin balalar men ata-analar arasynda qalyptastyrý.
BUU Damý Baǵdarlamasy, Qoǵamdyq mańyzy bar bastamalardy damytý qorynyń uıymdastyrýymen ótken festıvál aıasynda arnaıy brıfıń uıymdastyryldy. Oǵan QR Parlamenti Májilisiniń depýtaty, ekonomıkalyq reformanyń jáne óńirlerdiń damýy jónindedegi komıtettiń múshesi Maıra Aısına, Damytý qory tóraǵasynyń orynbasary Tatána Nemsan, QR BUU DB ókilderi, MO tabıǵı resýrstar jáne tabıǵat paıdalanýdy retteý basqarmasy basshysy Dúısen Qusbekov, ÚEU ókilderi men máslıhat depýtattary qatysty.
QR Parlament Májilisiniń depýtaty Maıra Aısına basqa óńirdiń adamdaryna Mańǵystaý tabıǵatyna beıimdelý qıynǵa soǵatynyn, kez kelgenniń mundaǵy aýa raıyna shydas bermeıtinin tilge tıek etti.
— Bizdiń kelgen maqsatymyz bárin talqylap, máseleni 1-2 kúnniń ishinde sheshe salý emes. Osy máselege halyqtyń nazaryn aýdartaıyq, ózimiz bastama jasaıyq degen oı boldy. Astanada keńsede otyra berseń, aımaqtarda, aýyldarda ne bolyp jatqanyn bilmeısiń. Aralasań, qaıda qandaı másele bar, qaı jerge kóńil bólý kerektiginen habardar bolasyń, — dedi ol.
2019 jyldan bastap makýlatýra, shyny qaldyqtaryn qoqysqa tastaýǵa ruqsat etilmeıtin bolady. Osyǵan baılanysty mamandar daıyndyq jumystaryn júrgizý qajettigin aıtyp, oǵan daıyndyq barysyn sóz etti.
— Qoqys óńdeý zaýytyn salýǵa múmkindigimiz bar. Biraq bizde qoqystardy jeke-jeke suryptaý psıhologıasy qalyptaspaǵan. Eýropada qaldyqtardyń óńdelý kórsetkishi 60-70% bolsa, bizde 10%. Osynyń bárin retteý úshin balabaqshadan bastap ýnıversıtet stýdentterine deıin jumystar júrgizýimiz kerek. Biz Eýropanyń 30-40 jylda jetken jetistigin 10 jyl kóleminde júzege asyrýymyzǵa ábden bolady. Sondyqtan psıhologıany qalyptastyrý
úshin jan-jaqty sharalar qoldaný kerek, — dedi tehnıka ǵylymdarynyń kandıdaty Nuraddın Jaıylhan.
Festıvál aıasynda «Birge jarqyraımyz!» art jobasy, energoeffektıvti kvest jáne «Biz taza Kaspıı úshin» atty jaǵalaýdaǵy tazalyq sharalary uıymdastyryldy.
