Mańǵystaý oblysy elimizde alǵashqy bolyp analogty habar taratýdy óshirip, sıfrlyq efırlik telehabar taratýǵa kóshti. Bul týraly Mańǵystaý oblysy ákiminiń baspasóz qyzmeti habarlady. Saltanatty sharaǵa QR Aqparat jáne komýnıkasıalar mınıstri Dáýren Abaev arnaıy keldi. Mańǵystaý oblysynyń ákimi Eraly Toǵjanov jáne «Qazteleradıo» AQ Basqarma tóraǵasy Iskander Tájibekovtiń qatysýymen sıfrlyq televızıaǵa kóshý saltanatty rásimi ótti.
QR Aqparat jáne komýnıkasıalar mınıstri Dáýren Abaev oblys turǵyndaryn quttyqtady.
«Shejireli Mańǵystaý oblysy tolyǵymen sıfrlyq telehabar taratýǵa kóshken elimizdegi eń alǵashqy aımaq. Mańǵystaýda sıfrlyq telehabar taratý úshin barlyq jaǵdaı jasalǵan. Sondyqtan Eraly Luqpanuly bastaǵan jergilikti ákimdik pen «Qazteleradıo» ujymyna atqarylǵan aýqymdy jumys úshin alǵys aıtamyn. Birinshiden, bul «Sıfrlyq Qazaqstan» baǵdarlamasyn júzege asyrýǵa baǵyttalǵan naqty qadamnyń biri. Sıfrlyq habar taratýdy engizý qala men aýyl arasyndaǵy aqparattyq alshaqtyqty tómendetedi, – dedi ol sıfrlyq efırlik telehabar taratýdyń artyqshylyqtaryna toqtala kelip.
Óz kezeginde Mańǵystaý oblysynyń ákimi Eraly Toǵjanov sıfrlyq efırlik telehabar taratýǵa kóshý sheńberinde jasalǵan jumystardy qorytyndylady.
«Habar taratýdyń jańa qalybynyń toqtaýsyz jumys isteýin qamtamasyz etý maqsatynda 21 radıotelevızıalyq stansıa qurylysy salynyp, jańǵyrtyldy, bul halqynyń sany shamamen 500 myń adamdy quraıtyn 47 eldi mekendi, ıaǵnı oblys halqynyń 99% qamtýǵa múmkindik beredi. Bul joba boıynsha 2014 jyly Jańaózen qalasy sıfrlyq efırlik telehabar taratý júıesine kóshti. Endi, mine, tolyqtaı jańa formatqa elimizde eń alǵashqy oblys bolyp Mańǵystaý ótýde. Oblysymyzda sıfrlyq telehabar taratý jelisiniń qamtý aýmaǵy 99%-ti qurady. Óńirimiz qazir analogtyq telehabar taratý jelisiniń óshirýge daıyn. 14 eldimeken jer erekshelikterine baılanysty sıfrlyq telehabar taratý júıesine tikeleı qosylý múmkindigi joq bolsa da, biz aýyldardy «OTAU TV» jerseriktik telehabar júıesine qosý arqyly 100 % telehabar taratýmen qamtamasyz ettik», - dedi Eraly Toǵjanov.
«Qazteleradıo» AQ Basqarma tóraǵasy Iskander Tájibekov respýblıkanyń barlyq aýmaǵy boıynsha ınfraqurylymnyń sıfrlyq efırlik habar taratýǵa kóshýge daıyndyq barysy týraly habarlady. Tájibaevtyń málimetinshe, Sıfrlyq habar taratýǵa tolyqtaı kóshý úshin búkil elimiz boıynsha 827 radıotelevızıalyq stansıany paıdalanýǵa engizý kerek. Búgingi tańda 414 RTS salynǵan. 2018 jyldyń aıaǵyna deıin taǵy 130 jýyǵyn aıaqtaý josparlanýda. Qalǵan stansıalar 2019-2020 jyldardaǵy kezeńde aıaqtalatyn bolady. Analogty habar taratýdyń tolyqtaı óshirilýi 2021 jyly iske aspaq.
