Mańǵystaýda tuńǵysh ret bodıbıldıngten respýblıkalyq chempıonat ótti. Oǵan on eki aımaqtan 200-ge jýyq sportshy qatysty.
Respýblıka kólemindegi sharaǵa Mańǵystaý oblysy ákiminiń orynbasary Maqsat Sqaqov qatysyp, bodıbıldıngtiń qoljetimdi sport túri ekenin, munymen kásibı sportshylarmen qatar basqa salalardyń ókilderi de aınalysa bastaǵanyn jetkizdi.
— Bodıbıldıng – estetıka, ásemdik jáne sulýlyq sporty, — dedi ol. — Kópshilik úshin bul sport túri ómir saltyna aınalǵan. Barlyq adam symbatty dene qalpyn qalaıdy, alaıda tek jigeri men sabyry myqtylary ǵana onyń nátıjesine qol jetkizedi. Sebebi bul sport túri qajyrly eńbekti talap etedi. Búginde bizdiń bodıbılderlerimiz tek dene músinine ǵana emes, ishki sulýlyqqa da asa mán beretini baıqalýda. Barlyq qatysýshylarǵa tabys, jeńis tileımin, - dedi.
Sharanyń basty uıymdastyrýshysy IFBB Respýblıkalyq bodıbıldıng federasıasy men Mańǵystaý oblystyq dene shynyqtyrý jáne sport basqarmasy.
— Sportshylardyń barlyǵy júldeli oryndarǵa talasty, irikteý ádil ótti dep aıta alamyn. Sebebi bul álem jáne Azıa chempıonatyna joldama berýge múmkindik beretin chempıonat. Chempıonatta eldiń túkpir-túkpirinen jınalǵan eń myqty sportshylarmen qatar, kórshi Reseı men Qyrǵyzstan sportshylary da qatysty. Sharanyń basty maqsaty–salaýatty ómir saltyn nasıhattaý, turǵyndar arasynda sportqa degen qyzyǵýshylyqty kóterý. Sondaı-aq chempıonat Aqtaý qalasynyń 55 jyldyǵyna da arnalyp otyrǵanyn aıtyp ótken oryndy bolar. Bul shara tek qatysýshylar ǵana emes, kórermenderdi de yntalandyryp, jas sportshylardyń qatary kóbeıedi degen úmittemin, — dep atap ótti IFBB Mańǵystaý oblysy boıynsha ókili Anatolıı Jdanov.
Qatysýshylar 66 dáreje boıynsha baq synady. 100-den asa sportshy Qazaqstan quramasyna ótti. Jeńimpazdardy atap aıtsaq, Mańǵystaý oblysynan Akram Zarapatogly «mens fızık» sanaty boıynsha 2-oryn alsa, Polına Zınoveva «fıtnes bıkını» atalymynan 3-orynǵa ıe boldy. Al týrnırdiń eń kúrdeli dárejesi boıynsha Sultan Álibekov 4-orynǵa taban tiredi. Sportshylar aqshalaı jáne baǵaly syılyqtarmen marapattaldy.
