Bul – janýardyń birneshe jyldan soń Mańǵystaýǵa oralýy. Ústirt memlekettik tabıǵı qoryǵy dırektorynyń orynbasary Meńdibaı Aǵıevtiń aıtýynsha, alabarys (leopard) 2015 jyly qaqpanǵa túsken. Ol adamdarǵa shabýyl jasaǵandyqtan óltirilgen. Odan buryn shamamen 2005 jyly paıda bolǵanymen, biraq esh jerge jarıalanbapty.

Bul joly Ústirt qoryǵyna kelgen jyrtqysh 29 qyrkúıek kúni qoryqtyń fototuzaǵyna túsip qalǵan.

-Biz ańdardy qarap otyrý úshin fototuzaq quryp qoıamyz. Bul alabarys Kókesem shoqysynyń ońtústik baǵytynda 40 shaqyrymda «Jaman Kendirli» bulaǵynyń mańyndaǵy fototuzaqqa túsip qalǵan. Bul – biz úshin jańalyq, óıtkeni leopard buryn bizdiń janýarlarymyzdyń tiziminde bolmaǵan, endi tirkep qoıamyz. Ǵalymdardyń aıtýy boıynsha, janýar Túrkmenstan elinde bar, sol jaqtan kelgen bolýy múmkin, - deıdi Meńdibaı Aǵıev.

Jalpy alabarys Afrıkada, Azıada, Túrikmenstanda, Reseıdiń Qıyr Shyǵysynda jıi ushyrasady. Negizinen tuıaqty ańdarmen (buǵy, elik, arqar, t.b.) qorektenedi.

Shapshań qımyldaıtyn janýardy «kózben kórgen» fototuzaqtyń búginde qoryq aýmaǵyna 8 danasy qurylǵan. Árqaısysynyń qýaty 2 aıǵa jetedi.

-Ol ań, qus, kez kelgen qozǵalǵan nárseni sýretke túsirip turady. Batareıasynyń qýaty eki aıǵa deıin jetedi. Degenmen biz eki aptada, bir aıda tekserip, sýretterin quıyp alyp otyramyz, - deıdi Meńdibaı Aǵıev.

Buǵan deıin apparatqa leopardtan ózge buryn kózge kórinbeı júrgen qaraqulaq, mysyqtyń túrleri, dala mysyǵy túsken. Qoryq mamandary endi ıtaıý janýaryn túsirýdi josparlapty.