Qyzylqoǵa aýdanyna at basyn tiregen belgili qoǵam qaıratkeri Orazgúl Asanǵazy bastaǵan top «Latyn álipbıine kóshý – zaman talaby» taqyrybynda semınar ótkizdi.

Oblystyq tilderdi damytý jónindegi basqarmasynyń uıytqy bolýymen «Arman» mádenıet úıinde ótken semınarda  fılologıa ǵylymdarynyń doktory, profesor Álimhan Júnisbek jınalǵan kópshilikti Elbasynyń Jarlyǵymen bekitilgen latyn álipbıiniń jańa úlgisimen tanystyryp, sózderdiń jazylýy men emle erejelerin túsindirdi. Sondaı-aq, semınarǵa qatysýshylarǵa aq paraq usynylyp, jańa qabyldanǵan álipbı boıynsha aty-jónderin jazý tapsyryldy. Oryndalǵan tapsyrmalarmen muqıat tanysqan profesor aty-jónderdiń durys jazylǵanyn aıtyp, bul latyn álipbıi boıynsha júrip jatqan nasıhat jumystarynyń nátıjesi ekenin atap ótti.

Budan keıin  Orazgúl Asanǵazy sóz aldy.

– Jańa álipbıdi jatyrqaýdyń qajeti joq. Eger elimiz órkendep, damyǵan elderdiń qataryna kirsin desek  latyn álipbıine kóshýimiz kerek. Árıne, bul bastamany Elbasynyń ózi bastap, Jarlyqqa qol qoıyp berdi. Endi osyny keńinen nasıhattaýymyz  qajet.  Qazir álemdegi ǵylym men ınternettiń seksen paıyzy osy latyn álipbıin qoldanady. Demek, latyn álipbıine kóshý – álemdik ǵylymǵa jol ashady. Endi biz jańa álipbıge qashan, qaıtyp kóshemiz? Ázirge bekitilgen jospar boıynsha 2019 jyly 1 synyp oqýshylary bastap oqıdy. Sosyn 2023 jyly keńsedegi is-qaǵazdardy kóshirý josparlanýda. Al, 2025 jyly túgeldeı kóshemiz. Biraq, bul jospar ǵana. Zamannyń baǵytyna qaraı taǵy da ózgerister enýi múmkin,- dedi depýtat.

Semınar barysynda jınalǵandar kelgen qonaqtarǵa kókeıde júrgen suraqtaryn qoıyp, tushymdy jaýap aldy.