Atyraý qalasyndaǵy «Bilim-Innovasıa» lıseıi bıyl «Rýhanı jańǵyrý» jobasynyń «Tárbıe jáne Bilim» atty kishi baǵdarlamasy aıasynda oqýshylar arasynda tegin negizde at sporty klýbynyń úıirmesin uıymdastyrýdy qolǵa aldy. Osyǵan oraı, Jańatalap aýylynda ornalasqan «Qulager» sharýa qojalyǵynda jańa klýb tusaýyn kesti.

Saltanatty ashylý rásiminde sóz alǵan «Bilim-Innovasıa» lıseıiniń dırektory Ismaıl Elma shákirtterin qýanyshtarymen quttyqtady.

– Memleket basshysy Nursultan Nazarbaev óziniń «Bolashaqqa baǵdar: rýhanı jańǵyrý»  atty maqalasynda: «Biz jańǵyrý jolynda babalardan mıras bolyp, qanymyzǵa sińgen, búginde tamyrymyzda búlkildep jatqan izgi qasıetterdi qaıta túletýimiz kerek. …Ulttyq kod, ulttyq  mádenıet saqtalmasa, eshqandaı jańǵyrý bolmaıdy» degen bolatyn.

Halqymyz sonaý erte zamannan ónerdiń san alýan túrin boıyna sińirip, ony urpaqtan-urpaqqa amanattap, búgingi kúnge jetkizdi. Ulttyq sportymyzdyń bir túri – at sporty. Endeshe, ulttyq jańǵyrýdyń endigi basym baǵyttarynda bizdiń ulttyq sport oıyndary  turýǵa tıisti bolsa kerek. Óıtkeni, bul ulttyq sana men ór rýhty qalyptastyrýdyń kilti bolyp sanalady. Endi munda 35 oqýshy ár apta saıyn arnaıy bólingen avtobýspen kelip, at sportymen aınalysa alady, – dedi ol.

Lıseı dırektorynyń tárbıe isi jónindegi orynbasary Amandyq Esqalıev kompúter men uıaly telefondaryna shuqshıyp alǵan qazirgi balalardy osyndaı ádispen ulttyq qundylyqtarǵa degen qyzyǵýshylyǵyn oıatýǵa bolady. Sondyqtan, mundaı jobanyń mańyzy zor ekeni aıtpasa da túsinikti.