Qarapaıymdylyq, tosyn, naqtylyq, senimdilik, emosıa jáne oqıǵa. Bul – maqaladaǵy oıdy sapaly etip qalyptastyrýdyń alty qaǵıdasy. Ony ár jýrnalıs  jetik, ári utymdy paıdalana bilse, oqyrman júreginen jol tabar dúnıe jazady. Bul týraly Garvard ýnıversıtetiniń túlegi Shyńǵys Muqan «Atyraý-Aqparat» seriktestiginiń baspasóz klýbynda ótken jıynda málimdedi.

Spıker «Jabysqaq» dep atalatyn semınar-trenıngte atalǵan alty qaǵıdany tereńirek taldap, maqalanyń ıdeıasy qarapaıym, ári tereń bolý qajettigin aıtty. «Maqalanyń negizgi ıdeıasy birinshi sóılemde ­– lıdte jazylady. Odan ári oılar tóńkerilgen pıramıda ispettes jalǵasa beredi. Sondaı-aq, baspasózdiń oqylymdy ári oqyrman sanynyń artýy úshin onyń ár betinde adamdardyń attary jıi atalýy tıis. Máselen, bir maqalada taqyrypqa baılanysty dúken satýshysynyń, qala turǵynynyń, mekeme basshysynyń, bolmasa basqa bir mamandardyń aty-jónin keltirip, olardyń pikirlerin jazyp otyrǵan jón» dedi Shyńǵys Muqan.

Onyń aıtýynsha, sheteldik baspasózder osy qaǵıdany jıi  qoldanady. Sondaı-aq, jazba adam oıynda jattalyp qalýy úshin tili qarapaıym, ıdeıasy tosyn bolǵany jón. Kúndelikti birqalyptylyqtan shyǵyp, tań qaldyratyndaı oı taýyp, jaqsy dúnıeler  usynǵan jón. «Jýrnalısiń jazǵan dúnıesi oqyrmanǵa erekshe áser etip, ony kóz aldyna elestetetindeı bolýy qajet. Materıaldardaǵy oı nanymdy bolýy úshin naqty mamandardy sóıletý mańyzdy. İshki-syrtqy senim kózderin paıdalanýǵa bolady. Adamdardyń jeke múddesine de nazar aýdarylady» dedi Shyńǵys Jumabekuly.