Qazaqstannyń Soltústik, Shyǵys jáne ortalyq óńirlerinde aýaraıynyń kúrt jylynýynan alapat tasqyn júrip, birneshe aýyl topan sýdyń astynda qaldy.

Ázirge resmı mekemeler tasqyn sýdan zardap shekkender (qaza bolǵan) týraly naqty aqparat taratpaǵan. Alaıda, keıbir derekkózderi men áleýmettik jelilerde Qyzylsaraı aýylynyń eki turǵynyn (mektep oqýshylary) sel aǵyzyp keteni týraly aıtylýda.

Qaraǵandy oblysy turǵyndarynyń aıtýynsha, mundaı alapat sý tasqyny buryn-sońdy bolmaǵan. Sý tasqynynan zardap shekken 6000-ǵa jýyq adamdy óńirlik TJD qyzmetkerleri  qaýipsiz aımaqqa kóshirgen.

Tosyn kelgen tasqynnyń saldarynan, ásirese, Qarqaraly, Abaı, Jańarqa, Shet, Buqar jyraý aýdandary tolyqtaı sý astynda qalǵan.

Oblystyq Tótenshe jaǵdaılar departamentiniń resmı málimdemesinde óńirdegi  1700-den asa turǵyn úıler men 35 aýyldyq okrýgti sý shaıyp ketken. Sondaı-aq, 340-tan astam mal basy qyrylyp qalǵan.

Meteorologtardyń aıtýynsha, Qaraǵandy oblysyndaǵy qystan qalǵan jınaq qar men qosymsha sý mólsheri ádettegiden eki-úshe ese kóp bolǵan. Al ótken senbide aýa temperatýrasy birden +23 °C gradýsqa deıin kóterilgen. Saldarynan qatqan muzdar men jınaq qar erip, arty selge ulasqan.

Qystyń kóbesi sógilip, sál kún jylynsa boldy qazaqstandyq TJM qyzmetkerleri aspannan túskendeı abdyrap qalatyny qalypty jaǵdaıǵa aınalyp ketti. Kúnniń kúrt jylynýy elimizdiń birqatar aımaqtaryna apatty jaǵdaı ákeletini aıan. Osyndaı apatty jaǵdaılarda halyqty qutqarýǵa arnalǵan tehnıkalardyń, júıelerdiń, apatty jaǵdaıǵa daıyn bolmaı shyǵatyny kóńil alańdatatyny taǵy ras. Tabıǵattyń tosyn minezi tentektik tanytqanda, halyqtyń da, TJM-nyń da qandaı kúıde qalatynyn jyl saıynǵy Syrdarıa tasqyny men bir ǵana Qyzylaǵash qyrǵyny kórsetip berip otyr. Tájirbıesi aıtarlyqtaı mol QR Tótenshe jaǵdaılar mınıstrligi jyl saıyn oryn alatyn sý tasqyndaryna áli de bolsa sabaq almaı otyr. Onyń aıqyn mysaly, Qaraǵandy oblysyndaǵy sel tasqyny. Sonymen qatar, óńirdegi sý jınaıtyn nysandar men kópirlerdiń jaǵdaıy da máz emes bolyp shyqty. Óńirlerde gıdrotehnıkalyq bógetter men ózen sýlarynan keletin qaýiptiń aldy alynbaǵan. TJD qyzmetkerleri tek sel tasqyny bolǵannan keıin ǵana áreketke kóshken.

©Nurgeldi Ábdiǵanıuly