Báıdibek aýdanynda óńir basshysy Janseıit Túımebaevtyń qatysýymen birqatar sport nysandary el ıgiligine berildi. Atap aıtqanda, búgin aýdanda buǵan deıin bolmaǵan jabyq tenıs korty men jabyq júzý baseıni ashyldy. Oblys ákimi sportqa den qoıǵan aýdannyń bir top jastarymen arnaıy kezdesip, pikir almasty.
"Buryn mundaı nysandar, kóbinese, qalalyq jerlerde boı kóterip, shaharda ómir súretin jastar úshin ǵana qol jetimdi bolatyn. Endi, mine, aýyldy jerlerde de tek sporttyń kúres, boks túrlerine ǵana emes, ózge de sırek shuǵyldanatyn sport túrlerine memleket tarapynan basymdyq berilip keledi. Bul Elbasymyzdyń taıaýda jarıalaǵan Joldaýynda aıtylǵandaı sportqa tereńirek mán berip, halyqtyń salaýatty ómir saltymen aınalysýy kerektigi týraly aıtqan tapsyrmasynyń bizdiń óńirde oryndalyp jatqanynyń aıǵaǵy dep bilem", - dedi aımaq basshysy.
Aıta ketý kerek, aýdan men aýyldy jerlerde zamanaýı sport nysandarynyń kóptep ashylýy tegin emes. Báıdibekten buǵan deıin Marat Myqtybekov (Azıadaǵy dzúdo federasıasynyń prezıdenti), Erkebulan Shynálıev (bokstan 2008 jyly Beıjińde ótken olımpıadanyń qola medal ıegeri), Qasymhan Tólenbaı (Qazaq kúresinen Álem chempıony) syndy sporttaǵy oǵlandar shyqqany belgili. Budan keıin de aýdanda búgingi paıdalanýǵa berilgen sport nysandarynyń arqasynda atalǵan saıypqyrandardyń jolyn qýyp, jalǵaýshylar kóptep shyǵyp, aýdannyń mereıin odan ári ústem etedi degen senim zor.
Jalpy quny 1,3 mlrd. teńge bolatyn Shaıan aýylynda ashylǵan nysandardyń demeýshisi sheteldik ınvestorlar. Atap aıtqanda, qurylysy byltyr bastalǵan sporttyq obektilerdiń tapsyrys berýshi mekemesi «International fund for Houbara Conservation» korporatıvtik qory. Jabyq tenıs kortynda arnaıy jýynatyn bólmeler qamtamasyz etilip, barlyq jaǵdaıy jasalsa, baseınde bir aýysymda 32 adam júzý sportymen mashyqtana alady.
Osydan soń, bul kúni sporttyń voleıbol, basketbol, fýtbol, tenıs túrleri men sport zaldaryna arnalǵan ashyq alańshalar paıdalanýǵa berildi.
Jalpy búgingi tańda Báıdibek aýdanynda balalar men jasóspirimder sport mektebi jumys isteıdi. Onda sporttyń 10 túrinen voleıbol, basketbol, fýtbol, ústel tenısi, toǵyzqumalaq, boks, qazaq kúresi, dzúdo, grek-rım, erkin kúres bólimderi bolashaq chempıondardy jattyqtyrýda. Sport mektebinde qazirgi tańda 84 bapker 157 topta 1810 oqýshymen jattyǵý jumystaryn júrgizedi. Jyl basynan beri aýdanda 97 sporttyq is-shara uıymdastyrylyp, 9 myńǵa jýyq aýdan turǵyny qatysqan.
Oblystan barǵan jumysshy top aýdanǵa sapary aıasynda Báıdibek Qarashauly eskertkishine gúl qoıý rásimin ótkizdi.
Osydan soń, Báıdibek aýdanynan shyqqan elimizge belgili azamattardyń basyn qosqan «Shejireli Shaıan, Berekeli Báıdibek» forýmy ótti. Onda tarıhqa baı aýdannyń ótkeni men keleshegi týraly baıandamalar oqylyp, Báıdibektiń áleýmettik-ekonomıkalyq damýyna úles qosqan birqatar azamattar marapattaldy.
