Túrkistan oblysynyń ákimi Janseıit Túımebaev IýNESKO-nyń Almatydaǵy klasterlik búrosynyń delegasıasymen kezdesti. Aımaq basshysy top quramyn bastap kelgen IýNESKO-nyń Parıjdegi tarıhı qalalyq landshafttar jónindegi keńesshisi Krıstına Iamandıge óńirimizdegi jańalyqtardyń jaıyn habarlap, delegasıanyń jańadan jańaryp, jańǵyrýǵa kirisken Túrkistan oblysynyń qaıta qurylǵan tusynda kelgenine rızashylyǵyn bildirdi.
«Túrkistan oblysy men IýNESKO-nyń óńirimizdiń áleýetin arttyryp, odan ári damytýda múmkindikteri zor dep bilem. Jyldyń basynda biz sizdermen «Mýzeı isi» mamandaryn oqytý boıynsha birlesken trenıńter ótkizdik. Búginde ózderińiz QR Mádenıet jáne sport mınıstrliginiń qoldaýymen "Túrkistandaǵy Q.A.Iassaýı kesenesin tarıhı landshaft qalashyǵyna baǵyttalǵan kózqarasty engizý jolymen tehnıkalyq qoldaý" Ulttyq semınaryn ótkizýdi bastadyńyzdar. Osy jyly Krısta Pıkkat hanymmen kezdesýde bizder materıaldyq jáne materıaldyq emes mádenı murany qorǵaý, sondaı-aq IýNESKO-nyń usynysymen tikeleı iske asyratyn mamandardy daıarlaý men olardy oqytý máselelerindegi jumysty tereńdetýge ýaǵdalastyq. Osyǵan baılanysty, IýNESKO-nyń Parıjdegi keńsesi men Krıstına Iamandı hanymnyń oblysymyzǵa sapary úshin jeke alǵysymdy bildirgim keledi», - dedi aımaq basshysy.
Eki jaqty júzdesýde ákim Qoja Ahmet Iassaýı mavzoleıi IýNESKO álemdik murasynyń nysany retinde sheteldik týrıser úshin tartylys kúshindeı ekenin sóz etken oblys basshysy eskertkishtiń, meılinshe, burynǵy keıpinde saqtalýy mańyzdy ekenin jetkizdi. Ondaǵy rekreasıalyq júktemeni eskergen ol keseneni basqarý menedjmentine sandyq tehnologıany endirý mańyzdy dep esepteıtinin bildirdi.
Otyrysta meımandar oblys basshysymen birge Túrkistan oblysy men onyń ortalyǵy Túrkistan qalasynyń tarıhı, qalalyq landshafttar máseleleri jóninde de áńgimelesti. IýNESKO-nyń Q.A.Iassaýı keshenin naqty aýmaqtyq baılanystyrý jáne ony Túrkistan oblysynyń ortalyǵy retinde Túrkistan shaharynyń jalpy damý dınamıkasyna biriktirý qajettigi týraly qorytyndyǵa kelgeni oblys úshin óte mańyzdy ekenin alǵa tartqan J.Túımebaev uıym tarapynan usynylatyn bastamalardy jan-jaqty, tolyq qoldaýǵa ázir ekenin jetkizdi. Bul rette, naqty nátıjege qol jetkizý úshin jumystardy sheberlik saǵaty, sarapshylar men mamandardyń basyn qosqan semınarlar túrinde uıymdastyrýdy usyndy.
