Qazaqstan Qytaıdyń eń jaqyn kórshisi ári eshqandaı qysym kórip jatqan joq. Bul týraly Memleket basshysy Nursultan Nazarbaev Astana Club otyrysynda málimdedi.

«Mundaı teketirestiń qaıdan shyqqany maǵan túsiniksiz. Bireýler Qytaı ózin memleket retinde tanytqysy kelip júrgen kontınent dep ataıdy. Endi biri halyq retinde tanytqysy keletin sıvılızasıa dep jatady. Iá, rasynda solaı. Qazaqstan Qytaıdyń eń jaqyn kórshisi, shekaramyz 1700 shaqyrym ǵana. Ári biz Qytaı tarapynan eshqandaı qysym, qorlaý áreketterin kórip turǵan joqpyz», - dedi Nazarbaev otyrys barysynda.

Buǵan qosa Elbasynyń aıtýynsha, Qytaıdyń ózinde másele degen jetip artylady – jumyssyzdyq, mıgrasıa jáne taǵy basqalary. «Men Qytaı tóraǵasy Sı Szınpınmen jıi kezdesi turamyn, biz bul máselede bir-birimizben ashyq sóılesemiz. Ózge aýdandarǵa shabýyldaý jaıly Qytaıdyń oıyna da kirip shyqpaǵan. Kerisinshe, olardyń ózderine damý kerek, tynyshtyqty qajet etedi», - dedi Prezıdent.

Ári Qytaı Qazaqstanmen tyǵyz baılanys ornatýda belsendilik tanytyp jatyr.

«Jibek jolynda» jahandaný damyp keledi, baǵdarlamaǵa álemniń 60-tan asa  memleketi qatysýda. Al Qytaı sol elderge kómektesýden aldyna jan salmaıdy. Budan jaýlap alýdyń ushyn da kórmeısiz», - dedi óz sózinde.

«Qytaı teńiz aımaqtary máselesinde Vetnammen, Japonıamen únemi qaqtyǵysqa ushyrap jatty. Alaıda jurt istiń baıybyna barmaı Qytaıdy kinálaı bastady. Men sarapshy emespin, eshkimdi jaqtaǵym da, qorǵaǵym da kelmeıdi. Munyń bári – elder arasyndaǵy senimdilikti joıady jáne adamzatqa tıimsiz teketirestiń bolýyna ákep soǵady», - dedi sózin qorytyndylaǵan Nursultan Nazarbaev.