Túrkistan oblysynyń ákimi Janseıit Túımebaev elimizdiń kóshbasshy jastarymen beıresmı kezdesý ótkizdi. Basqosýda Túrkistan óńirindegi jastardyń jetken jetistikteri men sheshýdi qajet etetin túıitkilder áńgime arqaýyna aınaldy.
Jıyn barysynda aımaq basshysy jalyndy jastardy túrki áleminiń rýhanı astanasy atanǵan óńirdiń órkendeýine úles qosýǵa shaqyrdy.
«Elbasy Nursultan Nazarbaev halyqqa arnaǵan Joldaýynda 2019 jyldy «Jastar jyly» dep jarıalady. Muny oblys halqynyń jastary erekshe yqylaspen qabyldady. Qazirgi tańda Jastar jylyn ótkizý jónindegi el Úkimeti jol kartasyn ázirleýde. Bul jobaǵa Túrkistan qalasynda ótetin iri kólemdi halyqaralyq is-sharalar engizilýde. Máselen, keler jyly Orta Azıa elderi jastarynyń Forýmy, túrki tildes memleketterdiń jastarynyń kongresi uıymdastyrylmaq. Sondaı-aq, oblystaǵy ár aýdannyń belsendi jastary aı saıyn «Túrkistanǵa tartý» atty shyǵarmashylyq sharalar ótkizilmek. Barshańyzdy osy syndy ıgilikti istiń qasynda bolyp, Túrkistanymyzdy damytýǵa shaqyramyn», – dedi Janseıit Qanseıituly.
Jastar jaǵy Túrkistan óńirinde óskeleń urpaqtyń jan-jaqty damýyna jaǵdaı jasalyp jatqany kóńil qýantatynyn jetkizdi. Óz kezeginde «Qazaqstannyń 100 jańa esimi» jobasynyń jeńimpazy, Dúnıejúzilik Toǵyz qumalaq Federasıasy sportshylarynyń jetekshisi, Toǵyz qumalaqtan álemniń 7 dúrkin chempıony Ásel Dalıeva, ózi jetken jetistikterin óńirimizdegi jastarǵa kórsetilgen qoldaýmen baılanystyrady.
«Qazirgi tańda óńirimizdiń jastary túrli salalardaǵy baıqaýlar men saıystarda bıik belesterdi baǵyndyryp júr. Bul rette, jastarǵa jasalyp jatqan qoldaýdyń mańyzy orasan zor. Búginde jatyqtyrýshynyń da qyzmetin qosa atqarýdamyn. Munyń barlyǵy Sizdiń bizderge degen senimińiz, jas sportshylardyń boıyna artylǵan úlken úmit. Oblys ortalyǵynyń Túrkistan qalasyna aýysýy toǵyz qumalaq sport túriniń odan ary jandanýyna múmkindik beretinin aıtqym keledi. Iaǵnı, jańa ǵımarattar men sport alańshalarynyń salynýy jas sportshylardyń jańa qyrynan kórinýine esik ashatyny sózsiz. Osy múmkindikterdi paıdalanyp oblysymyzdyń tek aldyńǵy qatardan kórinýine úles qosatynymyzǵa senim bildirgim keledi», – dedi Ásel Egizbaıqyzy.
Aıta keteıik, 3 kúnge jalǵasatyn forým «Tereń tarıhtan – jarqyn bolashaqqa!» atty respýblıkalyq pikir-saıys týrnırimen bastaý aldy. Saltanatty jıynǵa oblys ákimi J.Túımebaev arnaıy qatysyp, qatysýshylarǵa sáttilik tiledi. Debat oıynynda qatysýshylar eldegi jastar saıasaty men túrki áleminiń rýhanı astanasy atanǵan Túrkistan qalasyn damytýǵa baılanysty keleli máselelerin ortaǵa saldy. Saıysqa respýblıkanyń barlyq aımaqtarynan 2 adamnan qurylǵan 75 komanda qatysty.
Sondaı-aq, forým qatysýshylary Túrkistan qalasyndaǵy «Qoja Ahmet Iasaýı» kesenesi, Saýran qalashyǵy jáne Otyrar aýdanyndaǵy «Arystan bab» kesenesi, «Rýhanıat Ábý-Nasyr Ál-Farabı» murajaıy, «Kóne Otyrar tóbe» qalashyǵyn aralap, tarıhymen tanysty. Sondaı-aq, forým aıasynda jastarǵa arnalǵan «IntellectGAME» zıatkerlik oıyndary jáne halyqaralyq «Jaıdarman» saıysy ótedi. Oǵan Qyrǵystan, Ózbekstan, Bashqurstan, Tatarstan, Túrikmenstan, Túrkıa Respýblıkalarynyń qurama komandalary jáne elimizdiń ázilkeshteri qatysady dep kútilýde.
