Ar, uıat pen satqyndyq arasyndaǵy arpalysta ádildik únemi jeńiske jete bermeıdi. Adam ishindegi tolqynysta, mansap, aqsha, dańqqa degen mahabbat, adamnyń nápsisi qarapaıym adamı qasıetterdi jyǵyp, qaıta boı kótermeıtindeı basyp tastaıtyn jaǵdaılar jıi kezdesedi. Keshe Almatyda ótken «Trenıń lıchnostnogo rosta» fılminiń jabyq kórsetiliminde dál osyndaı jaǵdaıdy bastan ótkergen fılm keıipkeriniń arpalysy sıpattalady. Sh. Aımanov atyndaǵy «Qazaqfılm» kınostýdıasy túsirgen atalmysh fılmniń rejıseri Farhat Sháripov. Fılmniń jabyq kórsetilimine BAQ ókilderi, ónertanýshy, kıno synshylar qatysty.
QR Mádenıet jáne sport mınıstrligi tapsyrysy boıynsha túsirilgen «Trenıń lıchnostnogo rosta» fılminiń ataýyna qarap trenıńke qatysyp, ómirin jaqsy jaqqa ózgerte alǵan adamnyń ómiri baıandalady dep oılaýyń múmkin. Alaıda munda mansapqa qol jetkizip, jyly kresloǵa otyrý úshin adamnyń qandaı qadam jasaýyna májbúr bolǵany sýretteledi.
«Ár adamda tańdaý bar» degen sóz jıi aıtylady. Adamnyń tańdaýy – onyń bolmysyn, ishki jan dúnıesin dál sıpattaıdy. Keıde ómirde eki joldyń birin tańdaý kerek bolǵanda adam ózinen eshqashan kútpegen qadam jasaıdy.
Fılmde qoǵamda bar kóptegen máseleler qamtylǵan. Onda mansapta ósýde tanys-tamyrdyń yqpaly, jalǵyzdyq, qyz tárbıesi, ádildik úshin kúreste keıde aqsha men dańq sot tarazysynda basym túsetini, meshitke baryp, oraza ustaıtyn adamdardyń bári birdeı ımandy, qudaıdan qorqady degendi bildirmeıtini, bárinen buryn adamnyń uıaty aldyndaǵy jaýapkershiligi keıde nápsiden kemshin ketetin tustaryn kórýge bolady.
Fılmde shym-shytyryq oqıǵa baıandalmaıdy jáne ádettegideı fılmde kóp keıipker de joq. Oqıǵa eki akterdiń aınalasynda órbıdi. Qalǵandary janama keıipkerler. Kıno synshylar kartınada basty róldi somdaǵan Dýlyǵa Aqmolda men Erjan Túsipovtiń dýetine oń baǵasyn berdi. Eki akterdiń sátti tandemin ózderi kóp jyldyq tájirıbeniń arqasy ekenin atap ótti.
Fılm orys tilinde, Almaty qalasynda túsirilgen. Jabyq kórsetilimge kelgen ónertanýshylar fılmde bir aýyz qazaqsha sóz bolmaǵany fılm basqa qalada ótkendeı jáne fılmniń aıaǵy joq sekildi áser qaldyrǵanyn aıtady.
Fılmniń jabyq kórsetiliminen keıin fılm rejıseri Farhat Sháripov pen fılmniń basty keıipkerleri Dýlyǵa Aqmolda, Erjan Túsipov jabyq kórsetilimge kelgen qonaqtardyń suraǵyna jaýap berdi.
Dýlyǵa Aqmolda men Erjan Túsipov kóp jyl M. Áýezov atyndaǵy qazaq drama teatrynda jumys istegenin aıta ketý kerek.
«Trenıń lıchnostnogo rosta» fılmi 23-shi Halyqaralyq Pýsan Kınofestıvaliniń «Azıa kınosyna nazar salý» baǵdarlamasyna qatysqan.
Aıta keteıik, fılm 22 qarashadan bastap ulttyq prokatqa shyǵady.
