Jazýshy, Prezıdent stıpendıasy men «Serper» Jastar syılyǵynyń ıegeri Aıagúl Mantaı jalǵyz inisiniń ólimine qatysty sot otyrysynyń ádil júrgizilýin surap Elbasyna hat jazdy.
QR Prezıdenti
N.Á.Nazarbaevtyń,
Bas prokýror
Q.P.Qojamjarovtyń,
İshki ister mınıstri Q.N.Qasymovtyń,
Joǵary sottyń tóraǵasy J.Q.Asanovtyń
nazaryna
Men, Prezıdent stıpendıasynyń, «Serper» Jastar syılyǵynyń ıegeri, jazýshy Aıagúl Mantaı sharasyzdyqtan Sizderge hat joldap otyrmyn.
Sizderge hat joldap otyrǵan sebebim: 2018 jyldyń 23 tamyzynda Shymkent qalasynda oryn alǵan jol apatynan týǵan, jalǵyz inim, Túrkıanyń Ege ýnıversıtetiniń doktoranty, eki aptadan keıin doktorlyq dısertasıasyn qorǵaý úshin jolǵa jınalyp júrgen Mantaev Turatbek kóz jumdy. Bul kezde men Máskeý qalasynda edim, sebebi, shyǵarmashylyǵymdy tanytý maqsatynda alty jyldan beri Máskeý qalasynda turam.
Shymkent qalasyndaǵy Báıdibek bı men Kósherov kósheleriniń qıylysynda, tańǵy 8-30-da óz jolymen, biraq qatty jyldamdyqpen kele jatqan (qolymda vıdeoaıǵaq bar) BMV avtokóliginiń aldynan Toıoto avtokóligi shyǵyp, rólge ıe bola almaı qalǵan BMV avtokóligi jol shetinde baǵdarshamnyń janýyn kútip, ózimen ózi turǵan inime baryp soǵylǵan. İnim sol jol apaty oryn alǵan jerde til qatpaı kóz jumǵan. Marqum ákemniń qyrqy ótkenine bir aı óter-ótpes jalǵyz inimnen aıyryldym.
Toıoto 082 avtokóliginiń ıesi Ábılhasov Nurlan aıybyn tolyq moıyndap otyr. Biraq tergeý isinde BMV 286 avtokóliginiń qatty jyldamdyqpen kele jatqany eskerilmeı, kólik ıesi Mýrtazın Sabır tek qana jábirlenýshi bolyp kórsetilgen. Qatty jyldamdyqpen kele jatqan Mýrtazın Sabırdyń da inimniń óliminde kinási bar dep sanaımyn. Eger Mýrtazın Sabır qatty jyldamdyqpen kelmese, joldyń shetinde turǵan inime soqtyqpas edi. Quzyrly zań oryndarynan Mýrtazın Sabırdyń qandaı jyldamdyqpen kele jatqanyn anyqtaýyn suraımyn.
Tergeý isiniń ádil ótpeýine Mýrtazın Sabırdyń Prezıdent N.Á.Nazarbaevtyń, İshki ister mınıstri Q.Qasymovtyń, Bas prokýror Q.Qojamjarovtyń jáne basqa da quzyrly mekemelerdiń basshylaryna jazǵan aryzy tergeý isine qatysy bar adamdardy qorqytty dep sanaımyn. Eger kisi ólimine qatysy bar adamnyń (men qatysy bar dep sanaımyn) bári Sizderdiń attarynyńyzǵa hat jazyp, aqtyǵyn, kinásizdigin dáleldep, aryzben bárin qorqytyp, úrkite berse, tergeý isi qaıdan ádil ótsin, sot qaıdan ádil ótsin?!
Mýrtazın Sabırdyń Prezıdenttiń atyna, Bas prokýrordyń, İshki ister mınıstriniń atyna jazǵan úsh bettik aryzynyń kóshirmesi mende saqtaýly tur. İnimniń ólimine qatysty tergeý isin Baqtıar Dorıbaev júrgizgen.
Erteń, saǵat 10-30-da Shymkent qalasyndaǵy Qarataý aýdandyq sotynda inimniń ólimine qatysty ekinshi sot otyrysy ótedi. Sot Rahmanberdi Ermahan Erkinuly. Sizderden sotty toqtatyp, tergeý isin basynan qaıta júrgizýge qolushyn berýdi suraımyn. Adam ólimi oryn alǵan jerde Qazaqstan Respýblıkasynyń Konstıtýsıasy aıaqqa taptalmaýyn suraımyn.
Osy kúnge deıin bul máseleni qolǵa almaýymnyń sebebi: vıdeo keshe qolyma tústi. Aýylda, jalǵyz ulynan aıyrylyp, ańyrap otyrǵan aýrý anamnyń qasynan shyǵa almaı, tergeý isine qatysa almadym.
Sizderdi bul máselege, shetelde turatyn jazýshynyń janaıqaıyna beı-jaı qaramas dep senemin.
Aıagúl Mantaıdyń feısbýk paraqshasynan alynǵan
