Mýzeı ótken men búgindi, búgin men bolashaqty jalǵastyrar máńgilik kópir desek te bolady. Órkenıetti elderdiń bárinde derlik ulttyq mýzeıler ulttyq maqtanysh, rýhanı orda bolyp sanalatyny belgili. Mýzeı ǵylymnyń, bilimniń, mádenıettiń qalyptasýyna yqpal etetin ǵylymı mekeme retinde óskeleń urpaqtyń tárbıesine, tarıhı sananyń qalyptasýyna jáne rýhanı baıýyna yqpal etedi.
Qazaqstan Respýblıkasynyń Ulttyq murajaıy – tek elimizdiń ǵana maqtanyshy emes, Ol - Ortalyq Azıadaǵy eń úlken murajaı. «Mádenı mura» memlekettik baǵdarlamasy negizinde 2014 jyldyń 2-shildesinde Qazaqstan Respýblıkasynyń Tuńǵysh Prezıdenti N.Á. Nazarbaevtyń bastamasymen ashylǵan Astana tórindegi alyp ǵımarat syrtqy kelbetimen qatar, ishki zaldarynyń kóz tartar kórkemdiligi men kóne tarıh qatparlarynan syr shertetin qundy jádigerlerimen de kelýshilerdi kúnnen-kúnge tańyrqata túsýde.
QR Ulttyq mýzeıinde kezekti rýhanı is-sharany Ǵylymı ádistemelik jumystar bólimi, Ádisteme jáne mýzeıtaný sektory 2018 jyldyń 28 qarashasynda saǵat 11:00 - de ǵylymı kitaphanada L.N. Gýmılev atyndaǵy Eýrazıa ulttyq ýnıversıteti tarıh fakúltetiniń ǵylymı jumystar jónindegi dekannyń orynbasary Tatána Vasılevna bastaǵan bir top stýdenttermen «Ulttyq mýzeıge saıahat» atty kezdesý uıymdastyrdy.
Kezdesý barysynda stýdentterge mýzeıge baılanysty aqparattar berildi. Sharada Ǵylymı ádistemelik bólimniń, Ádisteme jáne mýzeıtaný sektorynyń jetekshisi Merýert Orazbaıqyzy jáne ǵylymı qyzmetker Rystaı Búrkitbaıqyzy men Ekaterına Pavlovna mýzeıge baılanysty baıandama jasady. Stýdentter ózderin qyzyqtyryp júrgen suraqtaryna jaýap ala aldy. Kezdesýden soń stýdentter ǵylymı qyzmetkerler otyratyn bólimge saıahat jasady.
Sharadan stýdentter úlken áser alyp, tarıhymyzǵa taǵy bir márte qanyǵyp rýhanı sýsyndap qaıtty. Bolashaqta osyndaı kezdesýler únemi jalǵasyn tappaq.
Rystaı Qorǵasbekova,
QR Ulttyq mýzeıiniń kishi ǵylymı qyzmetkeri
