Pavlodar oblysy Ekibastuz qalasynda «Nurly jer» baǵdarlamasy aıasynda naryqtaǵy baǵadan tórt ese arzan baǵada páter alýǵa múmkindik bar.
Pavlodar oblysynyń Ekibastuz qalasynda «Qazaqstannyń turǵyn úı qurylys jınaq banki» AQ arqyly satylymǵa qoıylǵan toǵyzynshy shaǵyn aýdandaǵy jańa turǵyn úıdiń baǵasy ádettegi turǵyn úı baǵasynan shamamen tórt esege arzan, al №21 shaǵyn aýdanda «Nurly jer» memlekettik turǵyn úı baǵdarlamasy aıasynda bes qabatty 4 úıdiń qurylysy júrip jatyr.
«Ekibastuz qalasyndaǵy Energetıkov kóshesindegi toǵyzynshy shaǵyn aýdandaǵy №66, 68, 70 jańa bes qabatty úılerdegi páterlerdiń quny bir sharshy metrine 135 myńnan 100 teńgege deıin tómendegen. Salystyrmaly túrde aıtar bolsaq, naryqta turǵyn úıdiń bir sharshy metriniń ortasha baǵasy, búginde, 200 myń teńgeni quraıdy. Atalmysh páterler «Qazaqstan turǵyn úı qurylys jınaq banki» AQ arqyly júzege asyrylady», - dep málimdedi Pavlodar oblysy Ekibastuz qalasy ákimdiginiń baspasóz-qyzmetindegiler.
Ekibastuz qalasynyń júzden asa turǵyndary búgingi tańda páter satyp alý úshin ótinim bergen. Bul jaıynda qarjy-nesıe mekemesiniń Pavlodar oblystyq fılıalynyń №1 servıstik ortalyǵynyń basshysy Arman Nurǵalamov málimdedi. Aıta keteıik, páter alý úshin ótinim berý jetinshi qazanǵa deıin jalǵasady.
Arman Nurǵalamov óz sózinde bul páterlerdiń «Nurly jer» memlekettik turǵyn úı baǵdarlamasy aıasynda salynǵanyn atap ótti. Al bul páterlerdiń qurylysyn ekibastuzdyq kompanıa JSHS «Gıdroprom» kompanıasynyń qyzmetkerleri júrgizgen.
«Gıdroprom» DSHS kompanıasynyń qyzmetkerleri ózderiniń jumysyna eki jyldyq kepildik beredi. Olar aǵymdaǵy jyldyń shilde aıynda paıdalanýǵa berilgendigin de ákimdik atap ótti. Páterler tolyǵymen jóndelgen, tap-taza qalpynda turǵyndarǵa tabystalady. Turǵyn úıge qol jetkizý úshin páterdiń jalpy somasynyń 20 paıyzyn bastapqy jarna retinde óteýi qajet, ary qaraı baspana nesıesi retinde beriledi.
Belgili bolǵandaı, bul úılerdegi páterler bir bólmeli, eki bólmeli jáne úsh bólmeli bolyp salynǵan, jalpy sany – 180 páter.
«Bir bólmeli páterlerdiń aýdany 44 sharshy metrdi quraıdy, al eki bólmeli páterler 54 sharshy metrden tursa, úsh bólmeli páterlerdiń jalpy aýdany 75 sharshy metrden turady. Bir bólmeli páterdiń quny 4,4 mıllıon bolsa, onyń alǵashqy jarnasy 900 myń teńgeni quraıdy, al eki bólmeli páter 5,4 mıllıon teńge, alǵashqy jarna retinde 1,1 mıllıon teńgeni tóleýdi qajet etedi, úsh bólmeli páterdiń quny 7,5 mıllıon bolsa, onyń alǵashqy jarnasy 1,5 mıllıon teńgeni quraıdy», - dep atap ótti Arman Nurǵalamov.
Sonymen qatar, Arman Nurǵalamov páter alý úshin de ózindik sharttar bar ekenin atap ótti. Eń aldymen, «Turǵyn úı qurylys jınaq bankinde» depozıttik shot ashtyryp, alǵashqy jarnany sol jerde jınaý qajet.
«Páter nesıesi 70 jasqa deıingi turǵyndarǵa beriledi. Jyldyq ósimi bes paıyzdan kóp emes. Nesıeniń maksımaldy ýaqyty on toǵyz jylǵa deıin sozylady. Sonymen birge, nesıeni 15 jylǵa alyp, ony on jylda jaýyp tastaýǵa da bolady», - dep málimdedi qarjy-nesıe mekemesiniń Pavlodar oblystyq fılıalynyń №1 servıstik ortalyǵynyń basshysy.
Onyń aıtýynsha, nesıeni ýaqytynan buryn tóleý úshin eshqandaı da aıyppuldar men sanksıa salynbaıdy. Tek, alǵashqy jarty jylda nesıeni belgili grafık boıynsha tólep turý qajet. Páterlerdi úlestirý konkýrs arqyly júzege asyrylatyn bolady, páter alýǵa ótinim qabyldaý áli júrip jatyr.
«Páter alýǵa ótinim bergen turǵynnyń buryn sońdy nesıe alǵan ba, ony ýaqytyly tólegen be, páter nesıesin tóleýge shamasy jete me jáne sońǵy alty aı kóleminde zeınetaqy shotyna tólem jasalǵan ba – osynyń barlyǵy da tekseriledi. Sonymen qatar, qandaı da bir týysyn nemese úshinshi jaqtaǵy adamdy kepil retinde kórsetýge bolady. Eger de barlyǵy sátti ótse, aǵymdaǵy jyldyń qarasha aıynda turǵyndar jańa páterge qol jetkizip, qonys toıyn toılaı alady dep oılaımyn», - dep atap ótti sarapshy.
Pavlodar oblysy Ekibastuz qalasy ákimdiginiń habarlaýynsha, «Nurly jer» memlekettik turǵyn úı baǵdarlamasy aıasynda bes qabatty tórt turǵyn úıdiń qalanyń №21 aýdanynda qurylysy júrip jatyr. Ol turǵyn úılerdi aǵymdaǵy jyldyń aıaǵyna qaraı paıdalanýǵa berý josparlanýda. Bul aýdandaǵy páterler de «Turǵyn úı qurylys jınaq banki» arqyly nesıege beriletin bolady.
