«Nurly jol» ınfraqurylymyn damytý baǵdarlamasyn iske asyrý barysynda memlekettik baǵdarlamanyń elimizdiń jalpy ishki óniminiń ósýine aıtarlyqtaı áser etip, sonymen qatar, jańa jumys oryndaryn ashýǵa jáne áleýmettik ınfraqurylymdy jaqsartýǵa edáýir yqpal etkenin baıqaýǵa bolady. Sonymen birge, búkil Qazaqstan boıynsha qazirgi zaman talabyna sáıkes ári sapaly avtojoldardy salýǵa basa nazar aýdaryldy.
Elbasy Nursultan Nazarbaev óziniń 2017 jyldyń qańtarynda jarıalaǵan «Qazaqstannyń úshinshi jańǵyrýy: jahandyq básekege qabilettilik» atty joldaýynda ótken jylda «Nurly jol» baǵdarlamasy tolyqtaı aqtalyp, edáýir jaqsy nátıje bergendigin jáne ekonomıkany tolyqqandy júrgizýshisi retinde odan ári iske asyrý mindetin qoıǵanyn atap ótken bolatyn.
«Qazirgi tańda jalpy uzyndyǵy 4,6 myń shaqyrymdy quraıtyn respýblıkalyq mańyzy bar avtomobıl joldaryn salý jáne qaıta jańartý boıynsha 23 jobany júzege asyrý josparlanyp otyr. Onyń ishinde 528 shaqyrymy jyldyń sońyna deıin paıdalanýǵa berilmek. Eldiń kóliktik jáne tranzıttik áleýetin tolyǵymen kóterý úshin kórshiles eldermen ózara yntymaqtastyq pen úılestirý qajet. Taýarlardy tranzıtteýdiń erkindigin qamtamasyz etip, kólik dálizderin quryp, olardy jańǵyrtý qajet. Kólik ınfraqurylymyn basqarý mekemesine, servıs qyzmetiniń óte sapaly ári joǵary deńgeıde bolýyna jáne ákimshilik kedergilerdiń tolyǵymen joıylýyna basa nazar aýdarý qajet. Transkaspıılik dáliziniń boıyndaǵy qozǵalys kóleminiń ulǵaıýyna baılanysty Quryq porty qurylysynyń ekinshi kezeńine aıaq basyp, joldy kesip ótýge múmkindikter jasaýdy qolǵa alý qajet», - delingen joldaýda.
2018 jyly avtomobıl joldaryn salý memlekettik baǵdarlamasy boıynsha jumys ornynyń sany da edáýir kóbeıgen. Eger 2017 jyly 100 myńnan astam jumys orny ashylyp, onyń 70 paıyzy jol qurylysyna baǵyttalǵan bolsa, 2018 jyly respýblıkalyq mańyzy bar avtomobıl joldarynyń qurylysynda 75 myń jumys orny paıda bolǵan. Bul kórsetkish ótken jylmen salystyrǵanda jumys ornynyń kóbeıgeniniń naqty dáleli bola alady.
«Nurly jol» baǵdarlamasy aıasynda 2020 jylǵa deıin 6,5 myń shaqyrymǵa jýyq aqyy joldy engizý josparlanyp otyr. Olardyń ishinde aǵymdaǵy jyly 471 shaqyrym iske qosyldy. Olar: Astana-Temirtaý baǵytyndaǵy avtomobıl joly, Almaty-Qapshaǵaı baǵytyndaǵy avtomobıl joly jáne Almaty-Qorǵas baǵytyndaǵy avtomobıl joly bolyp tabylady.
Jalpy, 2020 jylǵa deıin jeti myń shaqyrym joldy rekonstrýksıalap, qurylysyn júrgizý josparlanyp otyr. Sonymen qatar, tranzıttik konteınerlik júk tasymalynyń sanyn 10 esege deıin – 2 mıllıon konteınerge deıin arttyrý kózdelýde. Al áýe jolaýshylarynyń tasymalyn 4 esege deıin – 1,6 mıllıonǵa deıin arttyrý josparlanýda.
