«Eýropa qurlyǵynda Reseımen teketirese alatyn, Pýtın basqarǵan memlekettiń  aldaǵy saıasatyn sarapqa salyp, tujyrym jasaı alatyn jáne jedel sheshim qabyldaıtyn logıkasy myqty, salmaqty sarapshy-basshy qalmady». Bul týraly Polshanyń burynǵy Syrtqy ister mınıstri Vıtold Vashıkovskıı málim etti.

Polshanyń burynǵy Syrtqy ister mınıstri bul áńgimeni nege qozǵap otyr? Onyń pikirine sensek, Reseıdiń mańyndaǵy shekaralas elder Máskeýden qatty qaýiptenedi. Sondyqtan da olarda qashan da úreı bar».

–Eýropa qurlyǵynda tek qazirgi kezdi, bir sáttik saıası jaǵdaıdy ǵana oılaıtyn saıasatkerler bar. Bolashaqty boljaı alatyn myqty strateg prezıdentter joq. Qazir Reseı Eýropanyń osy álsiz tusyn paıdalanyp qalýǵa tyrysyp jatyr. Osyndaı múmkindikti tıimdi paıdalanyp, óziniń osy aımaqtaǵy qýatyn arttyrýda, –deıdi Vıtold Vashıkovskıı.

Bul oraıda burynǵy  eks- mınıstr 2005 – 2010 jyldary Polshanyń prezıdenti bolǵan Leh Kachınskııdiń óte kóregen saıasatker bolǵanyn aıtady. Leh Kachınskıı 2008 jyldyń ózinde -aq Reseı bolashaqta birqatar elderge  úlken qater tóndiretin aıtqan. «Aldymen Grýzıa, sosyn Ýkraına Reseıdiń basty qarsylasy atanady, atalǵan eki eldiń biraz bóligi Reseıge qaraýy múmkin. Odan keıingi orynda Baltyq jaǵalaýy elderi, atap aıtqanda, Latvıa, Lıtva, Estonıa tur»,– degen Kachınskııdiń málimdemesin eshkim áli umyta qoıǵan joq.  Kachınskııdiń boljamyna sensek, «bolashaqta atalǵan úsh elden keıin Reseı  Polshanyń qaýipsizdigine qater  tónedi».

Polsha sarapshysynyń aıtyp otyrǵanynda da jan bar sekildi. Jalpy mundaı pikirdi osydan biraz ýaqyt buryn nemis sarapshylary da aıtqan. Olardyń oıynsha, «shyn máninde qazir Eýropada Reseıdiń  saıasatyn aldyn ala  salmaqtaı alatyn, myqty saıasatker  prezıdent joq. Sarapshylar tek qana AQSH, Reseı jáne Qytaı men Úndistannyń saıasattaǵy ara salmaǵyn  saraptaýmen ǵana aınalysady. Al Eýropaǵa Máskeýden qaýip tónip kele jatqanyn eshkim paıymdamaıdy».