«Aq jol» partıasy sheneýnikterge qyzmettik baspana berýdi retke keltirýdi talap etti – tıisti depýtattyq saýaldy Májilistiń plenarlyq otyrysynda Merýert Qazbekova málimdedi.

Qazaqstan Respýblıkasynyń

Premer-Mınıstri

B.Á. Saǵyntaevqa

Qurmetti Baqytjan Ábdiruly!

«Aq jol» fraksıasy budan buryn arany ashylǵan sheneýnikterdiń shekteýsiz tábeti men olardyń sán-saltanatqa degen qushtarlyǵyna birneshe márte nazar aýdarǵan bolatyn. Nelikten ol salyq tóleýshilerdiń esebinen tólenýi tıis eken.  

Máselen, ákimdikterdi aıtpaǵanda, jergilikti jerlerde «kishigirim» bastyqtar, kolej nemese oblystyq fılarmonıa dırektoryna deıin qymbat jıp pen sedan minedi.

Áriden soń, bıylǵy jyly memleket esebinen qymbat páter alǵandar týraly aqparat birinen soń biri shyǵyp jatyr.

Bir apta buryn ǵana Pavlodarda aýmaǵy 230 sharshy metr, quny 50 mıllıon teńgeni quraıtyn qyzmettik páterge qatysty daý týǵan edi. Sondaı-aq, jalpy quny 226 mıllıon teńgeni quraıtyn bes páter satyp alynǵan.

Belgili bolǵandaı, bul alǵash tirkelip otyrǵan fakti emes, «aısbergtiń shyńy» ǵana.

Ústimizdegi jylǵy qyrkúıekte Atyraý qalasynyń ákimdigi 58 mıllıon teńgege jıhazymen qosa 5 bólmeli turǵyn úı satyp alǵan.

Al Óskemende eki elıtalyq turǵyn úı nysanyna 82 mılllıon teńge jumsaldy. Onyń bir toptamasy – bul tóbesi tórt metr bıiktikke jetetin, aýdany 260 sharshy bolatyn quny 45,3 mıllıon teńgelik bes bólmeli páter bolsa, ekinshisi – 210 sharshyny quraıtyn 37 mıllıonǵa baǵalanǵan tórt bólmeli páter.

Shymkenttiń turǵyn úı jáne turǵyn úı ınspeksıasy basqarmasy «asa» jaıly 5 qyzmettik páter satyp alý týraly habarlandyrý bergen. Ár páterge 43 mıllıon teńgeden bólinip otyr.

Kókshetaýda ákimdik 40 mıllıon teńgege aýmaǵy 145 sharshy metr 4 bólmeli páter satyp aldy.

Al Batys Qazaqstan oblysynyń Aqsaı qalasynda aýdan ákiminiń záýlim saraıyn jóndeýge búdjetten 24 mıllıon teńge bólingen.

Taǵy bir ákim, endi Almaty oblysy Jambyl aýdanynyń, keń parkıngi bar, aýmaǵy 180 sharshy metr baspanany 35 mıllıon teńgege satyp alýdy josparlaǵan. Al jýrnalıserdiń aqparatyna súıensek, sol Uzynaǵash eldi-mekenindegi eń qymbat kotej 20 mıllıon teńgeden aspaıdy

Bul tek baspasóz ben qoǵamǵa ǵana belgili bolǵan faktiler.

Elimizdegi barlyq qalasy men aýdanynda mundaı derekterdiń qansha ekenin tek boljaýǵa bolady. Sol nysandardyń qaısysy óz baǵasymen satyp alynǵanyn, al qaısysynyń joǵarylatylǵan baǵamen qymqyrý úshin paıdalanylǵanyn kim bilsin.

Osy oraıda, myńdaǵan qarapaıym azamat ıpotekasyn ýaqytynda tóleý úshin kún-tún demeı eńbektenip, kóp nárseden bas tartyp jatqanda, tipti «7-20-25» baǵdarlamasynyń ózi páterlerdiń quny boıynsha shekteýler men tólem mindettiligin júkteıdi, sáýletti turmysqa umtylǵan, ysyrapshyldyq pen astamshylyqqa jol bergen sheneýnikterdiń synǵa iligýi oryndy.

Onyń ústine, mundaı obektilerdi keıinnen jekeshelendirýin olarda turatyn sheneýnikter, sondaı-aq ózderi belgilegen talaptarǵa saı jeńildikpen turatyndardy esepten alyp tastaýǵa bolmaıdy.

«Aq jol»  fraksıasy memlekettiń aqshasyna sheneýnikterge qyzmettik baspana áperýdi baǵa parametrlerimen jáne baspana aýmaǵymen retteý kerek dep sanaıdy. Bul olardyń óz qalaýy boıynsha iske asyrylmaýǵa tıis.

Máselen, «7-20-25» baǵdarlamasy boıynsha dál sol Pavlodarda baspananyń eń joǵary baǵasy 15 mıllıon teńge bolyp bekitilgen. Al ákimdik páterdi ózine úsh ese qymbat baǵaǵa satyp alǵan.

Baıandalǵandy negizge ala otyryp, qurmetti Baqytjan Ábdiruly, «Aq jol» fraksıasy kelesi sharalardy qabyldaýyńyzdy suraıdy:

• Satyp alynatyn qyzmettik baspananyń qarapaıym ǵana ádeptilikti ustana otyryp, búdjet qarajatyn uqypty paıdalanýǵa saı keletinin anyqtaý úshin memlekettik organdar men búdjettik uıymdarǵa tekseris júrgizý. Mundaı baspanany jeke paıdalanýǵa berýde jekeshelendirý jaǵdaıy men talaptaryn da qosa eskergen jón. Tekseris qorytyndysynan Parlament pen qoǵam da habardar etilsin;
• Zań men etıka talaptary saqtalmaǵan zań buzýshylyq faktileri anyqtalsa kinálilerdi jaýapqa tartý;
• Memlekettik qyzmetshilerdi qyzmettik baspanamen qamtamasyz etýdiń qatań krıterıılerin bekitý. Máselen, «7-20-25» baǵdarlamasynyń parametrlerin negizge ala otyryp nemese ár otbasy múshesin turǵyn úı aýmaǵymen qamtý standarttaryn eskere otyryp;
• Yńǵaıly jáne keń turǵyn úı alǵysy kelgen memlekettik qyzmetshilerdiń de quqyǵy qarastyrylsyn, mundaı jeke qalaýlary óz qarajaty esebinen iske asyrylsyn.

Qurmetpen,

«Aq jol» fraksıasynyń depýtattary