«Senatqa zań jobalarynyń kelýinde birqalypty júıe joq. Shyn máninde, óte salmaqty ári kúrdeli zań jobalary boıynsha qysqa merzimde jumys isteýge týra keledi. Tıisti túzetýler asa qaýyrt, qarbalaspen engiziledi. Bizdiń usynysymyzdy Úkimet nazaryna alady dep oılaımyn. Úkimettiń ókildigine qatysty aıtarym, Sizderge jumysty isteý kerek qoı. Sizderdiń jumystaryńyz óte nashar». 
Senat Tóraǵasy búgingi Senat otyrysynda Úkimetke osyndaı eskertý jasady.
«Zań jobalaryn Senattyń qaraýyna usyný merzimderine qatysty osyndaı keleńsiz jaǵdaılardyń qaıta oryn alýyna jol bermeý qajet. Osy máselege Úkimettiń nazaryn aıryqsha aýdaramyn», -dedi Qasym-Jomart Toqaev.
Búgingi otyrystyń kún tártibine óte mańyzdy zań jobalary engizilip otyrǵanyn, onyń beseýi Elbasynyń Joldaýynda aıqyndalǵan maqsattardy oryndaý úshin ázirlengen zań jobalary ekenin aıtqan Q. Toqaev «Elbasynyń tapsyrmalaryn oryndaýǵa jyl basynan beri jetkilikti ýaqyt bolǵanyna qaramastan, birneshe kúrdeli zań jobalary Senatqa jyl sońynda ǵana bir paketpen kelip tústi. Senat depýtattary zań jobalary mańyzdy bolǵandyqtan, asa qysqa merzimde qarap, talqylaýǵa májbúr boldy», - dedi.
Jyl saıyn qaıtalanatyn mundaı jaǵdaı qabyldanatyn zańdardyń sapasyna oń yqpal etpeıtini belgili. Mundaı keleńsiz jaǵdaılardyń qaıta-qaıta oryn alýyna jol bermeý qajettigine Úkimettiń nazaryn aıryqsha aýdarǵan Q.Toqaev «Mańyzdy zań jobalary boıynsha Úkimet Parlament palatalarymen aldyn ala úılesimdi jumys kestesin belgilep alǵany durys», - dep eskertti.

Ádilbek Qaba