Aqtóbe oblysynyń ákimi Sinopec Group korporasıasyn kelisimsharttyq mindetterin oryndaýǵa shaqyrdy.
Aqtóbe oblysynyń ákimi Berdibek Saparbaev qytaılyq Sinopec Group munaı-hımıa korporasıasynyń Ortalyq Azıadaǵy ókildiginiń bas dırektory Fan Sánnanmen kezdesti.
Kezdesý kezinde «Saǵyz Petroleým Kompanı» JSHS, «Qazaqoıl Aqtóbe» JSHS jáne «Sınopek Qazaqstan» HQMK» JSHS kompanıalaryndaǵy ujymdyq kelisimshart jaǵdaılary men óndiristik baǵdarlamalardyń oryndalý máseleleri talqylandy. Olardyń bári de Aqtóbe oblysynyń aýmaǵynda jumys jasaıdy jáne Sinopec Group quramyna kiredi.
Berdibek Saparbaev:
- Bizdiń oblys jyldy ekonomıkasynyń ósimin bes paıyzben aıaqtaýǵa nıetti. Jyldyń qorytyndysynda munaı óndirý boıynsha jyldyq jospardy qamtamasyz etýlerińizdi suraımyn. Investısıa boıynsha suraqtar bar – «Saǵyz Petroleým» men «Sınopek Qazaqstan» HQMK» qazirgi tańda jospardy 1 mlrd teńgege oryndamaǵan. Bul somany jyl sońyna deıin qamtamasyz etý kerek, sonymen qatar, eńbekaqy boıynsha ósimdi de qamtamasyz etý qajet. Munda «Qazaqoıl» boıynsha másele joq, biraq qalǵan eki kompanıadaǵy eńbekaqy ósimi ınflásıa deńgeıinen tómen bolmaýy tıis,- dep atap ótti.
Oblys ákimi sondaı-aq, kásiporyndardyń 2019 jylǵa arnalǵan negizgi óndiristik mindetterin atady. Olardyń ishinde óndiristik kórsetkishter men ınvestısıany arttyrý, satyp alýdyń jergilikti mazmundaǵy úlesin arttyrý, jer qoınaýyn paıdalanýdaǵy kelisimshart boıynsha áleýmettik mindetterdi tolyq kólemde oryndaý jáne t.b. bar.
- Bastysy - kelisimsharttyq mindetterdi oryndaý. Bıylǵy jyldyń qorytyndysy boıynsha quzyrly mınıstrliktermen birge barlyq jer qoınaýyn paıdalanýshylardyń kelisimsharttyq mindetteri boıynsha atqarýshylyq tártibi qaralady. Sizdiń kásiporyndaryńyzǵa qatysty eleýli shaǵymdar bolýy múmkin,-dedi óńir basshysy.
Berdibek Saparbaev sondaı-aq, ilespe gazdy jaǵýdy jáne atylýyn tómendetýdi talap etti. Sol úshin Baıǵanın aýdanynda arnaıy gaz óńdeý kesheni salynǵan.
Fan Sánnan: «Bul biz úshin jaqsy jańalyq. Biz de gazdy bosqa jaǵýǵa múddeli emespiz. Bul óte jaqsy usynys»,-dep jaýap berdi.
Jalpy, Sinopec Group kompanıasynyń Ortalyq Azıadaǵy ókildiginiń bas dırektory aǵymdaǵy jyldyń qorytyndysy boıynsha kómirsýtek shıkizatyn óndirý jospary tolyq kólemde oryndalatynyna, sondaı-aq, jumysshylardyń eńbekaqylaryn kóterý jáne Aqtóbe oblysynda bolat
qubyrlar, almaz qashaýlar men munaı jabdyǵyn óndiretin zaýyt salý máseleleri qaralatynyna ýáde berdi.
