Almatyda «Uly dalanyń jeti qyry jáne qazaq ádebıeti» atty Qazaqstan Jazýshylar odaǵynyń İ Plenýmy ótti.
Qazaqstan Jazýshylar odaǵy basqarmasynyń ǵımaratynda ótken sharaǵa basqarmanyń músheleri, ǵalymdar men zıaly qaýym ókilderi, BAQ qatysty.
Otyrystyń ashylýynda Basqarmanyń tóraǵasy Ulyqbek Esdáýlet «Uly dalanyń jeti qyry jáne qazaq ádebıetiniń damý baǵyt-baǵdary» taqyrybynda baıandama oqydy.
«Elbasy Nursultan Nazarbaevtyń ejelgi tarıh pen mádenıetimizdiń qadir-qasıetin tanytqan «Uly dalanyń jeti qyry» maqalasy baspasóz betinde jaryq kórgennen soń, bizdiń basqarmada osyǵan qatysty jobalar júzege asyryla bastady. Búgingi alqaly basqosýda aldymen osy maqalanyń basty baǵyttaryn baǵamdap alýymyz qajet dep oılaımyn. Biz otarshyldyq qursaýynan ótken soń ózimizdiń tarıhymyzǵa ózimiz zárý bolyp kelgen elmiz. Qadyr Myrzalıev aǵamyzdyń «bizdiń tarıh ol daǵy qalyń tarıh, oqýlyǵy jup juqa biraq tarıh» degen sózin qaıtalaǵym kep otyr. Bizge óz tarıhymyzdy oqytpaı, basqa ulttardyń ózge elderdiń tarıhyn jetik bilgenimiz jasyryn emes. Altyn adam tabylyp jatsa, «ol - skıfterdiki, onyń qazaqqa qatysy joq» dedi. Sonaý Keńes kezinde Shiliktiden bir emes eki altyn adam tabylǵany belgili. Biraq onyń atyn da zatyn da qazaqqa buıyrtpady. Onyń ań stılindegi altyn áshekeıleri ermıtajda tur», - dedi Ulyqbek Esdáýlet.
Basqarmanyń tóraǵasy maqalada aıtylǵan keleli mindetterdi júzege asyrýda jazýshylardyń róli týraly da tilge tıek etti.
«Osyndaı olqylyqtardyń barlyǵynyń ornyn toltyratyn ýaqyt keldi. Maqalada aıtylǵan mindetter boıynsha jazýshylarǵa artylatyn júk bólek. Búginde sonyń bárin zerdelep oılastyrýdamyz», - dedi Jazýshylar odaǵy basqarmasynyń tóraǵasy U.Esdáýlet.
Jıyn sońynda Pleným qatysýshylary Elbasynyń maqalasynda aıtylǵan barlyq keleli usynystardy qoldap, biraýyzdan úndeý qabyldady.
«Uly dalanyń jeti qyry» maqalasy «Bolashaqqa baǵdar: rýhanı jańǵyrý baǵdarlamasynyń zańdy jalǵasy dep bilemiz. Álemdik keńistikke ulttyq kodymyz arqyly shyǵyp, barsha álem halyqtaryna qazaqtyń janyn, Táýelsizdigimizdiń myzǵymas rýhyn, qazynaly qundylyqtarymyzdy dáripteýdi murat etedi. Qazaq qalamgerleri óz shyǵarmalarynda qashanda tamyry myńjyldyqtarǵa ketetin tól tarıhymyzdy zerttep, zerdeleýge, ulttyq qundylyqtarymyzdyń nasıhattalýynda osyǵan deıin de ólsheýsiz eńbek sińirgeni aqıqat. Osy oraıda Prezıdent Ákimshiligine, QR Mádenıet jáne sport mınıstrligine, oblys ákimderine «Uly dalanyń jeti qyry» baǵdarlamasy aıasynda baıtaq Qazaqstannyń barlyq aımaqtaryn qamtıtyn «Tarıhı ádebı ólketaný» jobasyn usynamyz», - delingen úndeýde.
