"Kundelik.kz" – bul bıznes. Bilim salasynan habary bar Murat Ábenov osylaı dep kesip aıtty. Qoǵam belsendisi mekteptegi jańa jobanyń tıimsiz tustaryn tizip berdi. Ásirese, ata-analar tarapynan jaǵymsyz pikir kóp eken. Al mınıstr Saǵadıev ádettegideı elektrondy kúndelikke shań jýytpaıdy. Bul týraly Eýrazıa birinshi arnasy habarlaıdy.
Erlan Saǵadıev mınıstr bolyp kelgeli jyr bolǵan Kundelik.kz saıty bıylǵy oqý jylynda iske qosylǵan edi. Bir qyzyǵy, bul jobany engizbes buryn onyń balamalary usynylǵan joq. Tek osyny nasıhattaýmen boldy mınıstrlik.
“Áli tıimdiligine kóz jetpese de, sony usynady. Ata-ana da men kúndelikti paıdalanbaımyn, basqany paıdalanýǵa múmkindik joq. Reseıde osyndaı programma bar. «Dnevnık rý» degen. Ustazdarǵa ony paıdalanǵany úshin qosymsha aılyq tóleıdi”,-deıdi qoǵam qaıratkeri Murat Ábenov.
IT salasynyń mamany ári oqýshy tárbıelep otyrǵan Rymbek İzǵalıdiń aıtýynsha, mundaı jobany jasaý asa qıyn emes, qymbatqa da shyqpaıdy. Otandyq mamandardyń qolynan keledi. Al qazirgi elektrondy kúndelik jobasynyń reıtıńi de tómen deıdi. Saıası astaryn aıta almasa da, tehnıkalyq turǵyda taldaý jasap berdi.
“Eń qarapaıym nárse, sizdiń birneshe balańyz bolýy múmkin. Keıde eki balasy eki mektepte oqıtyn jaǵdaı bolady. Sondaı jaǵdaıda ár balaǵa bólek akkaýnt ashýyńyz kerek. Jáne ekeýine aqshany bólek tóleısiz. Ol ol ma, saıtqa bólek tóleısiz, qosymshaǵa bólek tóleısiz” – deıdi İT mamany Rymbek İzǵalı.
Onsyzda qoǵamda bedelden jurdaı bolǵan muǵalimderge qosymsha tegin júkteme taýyp bergen bilim mınıstrliginiń basshylyǵy kundelik.kz-ti qyzǵyshtaı qorǵap álek. «Ata-anaǵa kún saıyn elektrondy kúndelikke kirý mindetti emes»,- deıdi Saǵadıev myrza.
“Kún saıyn kúndelikke kirý kerek emes. Ata-analar ózderi sheshedi. Balalardyń baǵalaryn kórý, úı jumysyn, sosyn muǵalimdermen aqyldasý degen jaǵdaıda sonda ǵana kúndelikke kirýge bolady” – deıdi QR Bilim jáne ǵylym mınıstri Erlan Saǵadıev.
Bilim salasynan habary bar, bir kezderi vıse-mınıstr, depýtat bolǵan Murat Ábenov Kundelik.kz jobasyna qatysty bir shyndyqtyń shetin aıtyp qaldy.
“Qaıda paıda bar sonda? Túbin qarasaq, bul bıznes júıe. Neǵurlym sol júıege adam kirse, sonshalyqty jarnama berýshiler kóbirek paıda tabady. Eger ol bıznes bolsa, bıznes bolyp jumys istesin. Onyń nesin bir birimizden jasyramyz” – deıdi sarapshy, qoǵam qaıratkeri Murat Ábenov.
Qaı salaǵa da zaman kóshine ilesetin jańalyq kerek. Biraq bilim salasy reformaǵa kende emes edi. Endi mine, taǵy bireýi qosyldy. Taǵy da júıesizdik bastaldy. Qala mektepteri ýlap, shýlap elektrondy kúndelikti meńgerip jatyr. Al ınternetke zárý aýyl-aımaqtaǵy ahýal aıtpasa da túsinikti.
