Búgin «Nur Otan» partıasynyń jas ónertapqyshtar arasyndaǵy respýblıkalyq «NURINTECH» ınovasıalyq jobalar baıqaýynyń jeńimpazdary marapattaldy.

Jeńimpazdardy quttyqtaǵan partıa Tóraǵasynyń Birinshi orynbasary Máýlen Áshimbaev atalǵan baıqaýdyń Elbasy tikeleı tapsyrmasymen qolǵa alynǵan joba ekenin aıtty. Onyń basty maqsaty – talantty, bolashaǵynan úmit kúttiretin, ǵylym men ınovasıada tyń ıdeıalardy qolǵa alyp, jumys istep júrgen jastarymyzdy qoldaý, olarǵa óz bastamalaryn tabysty júzege asyrýǵa jaǵdaı týǵyzý.

Óz sózinde Máýlen Áshimbaev mundaı bastamalardyń elimiz úshin bereri mol ekenin aıtty.

– Búginde elimizde Elbasymyzdyń bastamasymen Qazaqstannyń Úshinshi jańǵyrýy júzege asyrylyp jatyr. Bul keshendi baǵdarlamanyń negizinde elimizdiń tehnologıalyq, ınovasıalyq jáne údemeli damýy kózdelgen. Tehnologıalyq damýdyń negizgi kilti ǵylymı jańalyqtar men ınovasıa ekeni sózsiz. Sondyqtan qazirgi tańda osy baǵyttaǵy bastamalardy, startaptardy, ǵylymı jáne İT-jobalardy qoldaýdyń mańyzy zor, – dedi partıa Tóraǵasynyń Birinshi orynbasary.

Odan bólek, Máýlen Áshimbaev jastarǵa óz kúshterine senip, oılary men ıdeıalaryn júzege asyrý jolynda tabandylyq tanytyp, armanyna jetý úshin aıanbaı eńbek etý kerektigin aıtty.

– Biz qazir Google, Amazon, Apple, Microsoft, Tesla, Alibaba sıaqty iri ınovasıalyq kompanıalardyń ónimderin qoldanamyz. Olar da arman men maqsattardyń jáne tabandy eńbek pen qajyr-qaırattyń jemisi. Olardyń negizin qalaýshylar qoldarynda múmkindik bolmasa da óz jobalarynyń jemis beretinine senip, eńbektene bildi. Sondyqtan búgingideı tabysqa jetip otyr. Sol sebepti sizder de óz múmkindikterińizge senip, jumys isteýlerińiz kerek, – dedi Máýlen Áshimbaev.

Bıyl qatarynan úshinshi ret uıymdastyrylǵan baıqaýǵa 1000-nan astam jumys kelip túsken. Nátıjesinde úsh atalym boıynsha jeńimpazdar men júldegerler anyqtaldy. Olardyń árqaısysyna qarjylaı syılyqtar tabys etildi. Atap aıtqanda, 1-oryn alǵan jas ǵalymdarǵa 1 mıllıon teńge syıaqy taǵaıyndalsa, 2-oryn ıegerlerine – 500 myń, 3-oryn alǵan ónertapqyshtarǵa 250 myń teńgeden berildi. Baıqaýdyń jalpy júlde qory 5 mıllıon teńgeni qurady.