"Qusty jısań – búrkit jı, Qus tonyńdy túlki eter. Bulǵyn, sýsar kıinip, Azbas, tozbas múlki eter" deıdi Abaı. San ǵasyr boıy atadan mura bolyp kele jatqan qyran qustyń kıesi men qasıeti qashan da bıik. Ol qazaqtyń salty men dástúri úshin qanshalyqty mańyzdy bolsa, ony baptaıtyn qusbegilerdiń de orny bólek.

Massaget portaly derekti fılmder serıasyn bastapty. Áriptesterimizdiń ıgi bastamasyna qoldaý kórsete otyryp, derekti fılmder leginiń alǵashqysyn  –  "Áke joly: Shańyraǵyna qut qonǵan qusbegini" oqyrman nazaryna usynamyz.

Búgingi keıipker – Baýyrjan Seıitjanuly. Áke jolyn jalǵaǵan qusbegi Baýyrjannyń tórt uly da búrkitshi. "Ulym qyran bolsyn, qyranym uran bolsyn" degen sózdi tý etken bul otbasy qyran qus tóńireginde, qusbegilik óner jaıly ózderi baıandap beredi.