Qazaqstan İshki ister mınıstri Qalmuhanbet Qasymov Qaraǵandy oblysynda qoryqshylarǵa shabýyldady degen kúdiktilerdiń anyqtalǵanyn habarlady dep jazady Qamshy.kz aqparat agenttigi Azattyqtyń deregin negizge alyp. Astanada parlament senatyndaǵy jıynnan soń jýrnalıser saýalyna jaýap bergen Qasymov "Kúdiktilerdi anyqtadyq. Ol jerde eki kólik bolǵan, olar da belgili boldy. Oqıǵany kórgender de bar" dedi.

Mınıstr kúdiktilerdiń Qyzylorda oblysynyń turǵyndary ekenin ǵana habardar etip, qansha adam ekenin aıtpady. Bul oqıǵa boıynsha Qylmystyq kodekstiń "adam óltirý" babymen is qozǵalyp, kúdiktilerge izdeý jarıalanǵan.

— Olar eki kólikpen júrgen. Qylmysty bir kóliktegi úsh adam jasaǵan. Ekinshi kóliktegilerdi anyqtaý arqyly qylmys jasady degen kúdiktilerdi anyqtadyq, — dedi Qasymov.

Aýyl sharýashylyǵy mınıstrligi 15 qańtarda Qaraǵandy oblysynyń Nura aýdanynda "Ohotzooprom" respýblıkalyq mekemesiniń ınspektory kıikter men sırek kezdesetin janýarlardy qorǵaý reıdi kezinde brakonerler qolynan aýyr jaralanyp, qaıtys bolǵany týraly aqparat taratqany belgili.

Mınıstrliktiń málimetinshe, 13 qańtarda keshke Toyota Land Cruiser kóligindegi belgisiz úsh adam olardyń izine túsken ınspektorlar Nısyk pen Nurǵalıevke qarsylyq tanytyp, qarýdan oq atqan. Arada eki saǵattan astam ýaqyt ótkende polısıa men ınspektorlar shabýyldan jaralanǵan ınspektorlardy tapqan. Basynan aýyr jaralanǵan Erlan Nurǵalıev 14 qańtarda Astanadaǵy №1 qalalyq emhanaǵa jetkizilgen. Bir kúnnen artyq es-tússiz jatqan Nurǵalıev 15 qańtarda qaıtys bolǵan.

Qańtar bastalǵaly beri Qaraǵandy oblysynda osymen ekinshi ret zańsyz kıik atý deregi tirkelip otyr. Aıdyń basynda Ulytaý aýdanynda polısıanyń qyzmetkeri "zańsyz kıik aýlady" degen kúdikpen ustalǵany belgili.

Qazaqstanda quryp ketý aldynda turǵan janýar retinde Qyzyl kitapqa engizilgen kıikti aýlaýǵa tyıym salynǵan.